Изгледа се што води од и до Груевски, ВМРО-ДПМНЕ и нивните послушници, се врти околу милион. Неверојатни милион евра дал или ќе даде Никола Груевски за црна кампања против Зоран Заев за само 10 дена во месец јануари годинава, информираше портпаролот на СДСМ, Петре Шилегов.
Тој ја презентираше пресметка направена според официјалните ценовници на 5-те медиуми на коишто се емитувани или објавени анти-рекламите против претседателот на СДСМ: телевизиите Сител, Канал 5 и Алфа, весниците Дневник и Утрински и за закупените билборди.
– Милион евра од Груевски и ВМРО-ДПМНЕ за црната медиумска кампања против претседателот на СДСМ емитувана за само 10 дена. Околу 100 илјади евра дневно за спотови и пропаганда против Зоран Заев.
– Груевски и ВМРО-ДПМНЕ на Сител и на Канал 5 исплатиле или треба да исплатат ОКОЛУ 60 илјади евра за еден ден. По 30 илјади евра дневно за телевизиите на коалиционерите на Груевски, Ѕинго и Стојменов. По околу 10 илјади евра на ден за Алфа.
– По околу 800-тини евра дневно за оцрнување на Заев во Дневник и Утрински весни. По околу 30.000 евра на ден за билбордите низ земјата, рече Шилегов.
Според него како нарачател на овие анти-реклами е потпишана ВМРО-ДПМНЕ. Партијата на Груевски којашто според ревизорскиот извештај за предвремените избори во 2011 година, имаше финансиска дупка од 3,5 милиони евра.
Денес, две ипол години потоа, оваа партија, ВМРО-ДПМНЕ, е способна да плати 10-дневна црна кампања тешка милион евра.
„Ова е пресметка врз основа на достапни податоци само за втората половина на јануари. Црната кампања против претседателот на СДСМ трае по локалните медиуми, по билбордите низ земјава, а воедно трае и промотивна кампања на ВМРО-ДПМНЕ, така што оваа сума е веројатно неколкукратно повисока“ реше Шилегов.
СДСМ прашува претседателот на ВМРО-ДПМНЕ Никола Груевски од каде неговата партија има на располагање милиони евра? Дали можеби Никола Груевски преку Владата со државни пари финансира оцрнување на политичкиот противник Зоран Заев?
Дали можеби приватни компании се притиснати да ја плаќаат пропагандата против лидерот на опозицијата Заев?
СДСМ веќе објави уплати тешки милион евра што се одлеале од Владата на РМ само на сметка на телевизија Сител, на име реализација на кампања. Без да се прецизира за каква кампања станува збор. Што отвора сериозни сомнежи за злоупотреби на пари на граѓаните за партиски цели. Овде нема да говориме за милионските тендери на уредниците послушници, за што институциите молчат.
СДСМ порачува дека надлежните институции се должни да ги испитаат сите наводи за криминално корупциски скандали што ги обелодени СДСМ и посебно финансиското работење на партијата на премиерот Никола Груевски, ВМРО-ДПМНЕ.