– Најостро ја осудуваме нарачаната бруталност и пречекорување на овластувањата на полициските структури на Никола Груевски и Сашо Мијалков врз граѓаните на Република Македонија, не само на ова место, пред владата, туку и низ улиците на главниот град. Беше очигледно дека неколку минути пред 22:00 часот, власта ги собра полициските и параполициските структури пред зградата на владата и испровоцира судир со граѓаните, реагираше денеска портпаролот на СДСМ, Петре Шилегов по синоќешните протести.
Како што вели тој, полициските структури, по нарачка на Груевски, тепале млади, студенти, жени, недолжни граѓани, а целата операција за употреба на безмилосна сила врз граѓаните, била смислена во домот на Никола Груевски во којшто вчера, во попладневните часови, пристигнале Сашо Мијалков и Мартин Протуѓер.
– Потоа, нарачаниот план е задолжена да го спроведува Гордана Јанкулоска, која од лице место, пред зградата на Владата, командуваше со насилството врз сопствените граѓани. Со вчерашната наредба да се употреби сила врз народот, на протест на којшто граѓаните искажаа револт против криењето на убиството на Мартин Нешковски, Груевски по втор пат се обиде да ја убие вистината за овој случај, потенцираше Шилегов.
Тој вели целосната одговорност за “безмилосното тепање на граѓаните“ е кај премиерот Никола Груевски, министерката Гордана Јанкулоска и нивните извршители во структурите на МВР.
Шилегов вели Груевски со вчерашната брутална полициска акција го избрал патот на тепање на сопствените граѓани, по примерот на диктаторите како Милошевиќ, Чаушеску, Лукашенко.
Портпаролот на СДСМ го повика и Горан Петрески, главен и одговорен уредник на МРТВ, да престанел да ги штити насилниците на власта во заминување.
Одговарајќи на новинарско прашање, за обвинувањата дека СДСМ (и Радмила Шеќеринска) го координирале протестот, Шилегов одговори дека Социјалдемократскиот сојуз јавно и транспарентно го најавил датумот за кога ќе се јави како еден од организаторите или главен организатор на општограѓанскиот собир, односно на 17-ти мај.