На денешното продолжениe на расправата за предлог законот за употреба на јазиците на Комисија за европски прашања, пратеникот од СДСМ, Петре Шилегов рече дека предложениот закон ќе донесе хомогенизација, мир и стабилност во меѓуетничките односи.
– Никој и со ништо нема да ја ограничи употребата на македонскиот јазик со предложениот закон за употреба на јазиците, ниту тоа ќе се случи со било кој друг јазик што е во употреба во Република Македонија, рече Шилегов.
Крајно неодговорно е, како што посочи, да се тврди дека во Берово, во Виница, во Делчево ќе дојде до ограничена употреба на македонскиот јазик.
– Одговорни луѓе кои што одлучиле својот живот да го посветат на политиката мора да имаат визија за сопствената држава и да креирааат процеси за стабилност и политичка благосостојба во следните дваесетина години, рече Шилегов и повика да се поддржи Законот за употреба на јазиците.
Пратеничката на ВМРО-ДПМНЕ, Нола Исмајловска-Старова реплицирајќи му на пратеникот Весел Мемеди од НДП, рече дека цело време ги спомнуваат само Албанците. Во контекст на тоа праша каде се другите етнички заедници во овој Предлог-закон.
Според неа, со овој закон нема да се намали, туку ќе се продлабочи јазот меѓу етничките заедници, затоа што ова законско решение им дава право само на Албанците.
Пратеникот Мемеди на седницата даде предлог да се смени Уставот и сите граѓани да уживаат еднакви права.
– Ако вие како ВМРО толку се грижите за другите етнички заедници, да ги смениме Уставот и унитарниот карактер на државата и да бидат еднакви сите граѓани. Ајде да го смениме Уставот и сите граѓани така ќе бидат рамноправни, додаде Мемеди.
Според него, никој не треба да се плаши од законот за употреба на јазиците.
– Станува збор за универзално право и не треба да се сее страв дека државата ќе се распадне ако се усвои овој закон, рече Мемеди.
Расправата за предлог-законот за употреба на јазиците започна вчера во Комисијата за европски прашања а за него ќе има општа расправа до завршувањето на работниот ден во четврток. Потоа тој ќе се најде пред пратениците на пленарна седница по што ќе се врати во Комисијата на второ читање.
Опозицијата, како што најави вчера пратеникот и координатор на една од пратеничките групи на ВМРО-ДПМНЕ, Илија Димовски, планира неколку амандмани за како што рече тој, да се расчистат уставните аномалии.