Една украинска телевизија објави снимка на која се гледа како полицијата брутално ги тепа демонстрантите.
Снимката е направена минатата недела во една киевска улица, а беше објавена вчера. На неа се гледа како полицијаците ги тепаат демонстрантите со пендреци и ги шутираат додека лежат на земја.
Веќе една недела траат демонстрациите против Владата во кои учествуваат неколку илјади луѓе, а се започна по одлуката на претседателот Виктор Јануковиќ да го замрзне процесот на зајакнување на врските со ЕУ и свртување кон Русија.
Судирите меѓу демонстрантите и полициската единица Беркут, специјализирана за растерување на демонстранти, започнаа во петокот минатата недела, кога беа повредени најмалку 35 луѓе.
Денеска неколку илјади демонстранти се собраа на главниот плоштад во Киев близу украинската Влада.
Главното истражно одделение на украинското Министерство за внатрешни работи го повика Виталиј Захарченко, министер на дотичнотото министерство на испитување поради постоењето сомневање дека украинската полиција ги пречекорила овластувањата во пресметката со демонстрантите.
Опозицијата бара оставка од Захарченко, но тој рече дека тоа не му паѓа на памет, додавајќи дека постои група на луѓе кои наскоро ќе бидат приведени поради предизвикување на немири.
Захарченко истакна дека и Димитриј Корчински, водачот на организацијата Братство, активно учествувал во демонстрациите.