Министерството за транспорт и врски денеска објави оглас за продажба на градежната парцела на плоштадот „Македонија“, атрактивна локација на која најпрвин беше најавена изградба на црква, а потоа Народната банка требаше да го гради своето ново административно седиште.
Земјиштето со површина од 1.046 метри квадратни е наменето за изградба на објект со приземје и три ката, со бруто изградена површина од 3.780 метри квадратни, јавува build.mk.
Идното здание во центарот на Скопје е предвидено за комерцијални и деловни дејности. Почетната цена изнесува 6.000 денари за метар квадратен, а сите заинтересирани субјекти треба да платат депозит за учество на електронската лицитација во износ од 700.000 денари, но и да достават банкарска гаранција во висина од 100.000 евра за сериозност на понудата.
На тендерот можат да учествуваат единствено компании што оствариле годишен обрт поголем од 30 милиони евра во текот на 2012 година. Пријавите треба да се достават најдоцна до 28 јуни, а електронската лицитација ќе се одржи на 5 јули.
Како што јавува порталот, надлежното министерство пронајде начин да ја пресретне најавата на Општина Центар дека ќе изврши ревизија на ДУП „Мал Ринг“.
Ако се измени урбанистичкиот план, тогаш според условите во огласот најповолниот понудувач треба да подготви основен проект врз основа на второ идејно решение за фасадата на објектот, кое повторно е изработено од министерството и ќе треба да ја помине истата процедура како во првиот случај.