Германската канцеларка Ангела Меркел е подготвена да ја остави Грција да излезе од еврозоната доколку радикалната левица ја доведе во прашање буџетската политика која од Грците бара да штедат, објави денес Шпигел во своето онлајн издание.
“Германската влада смета дека е речиси неизбежно излегувањето на Грција од еврозоната доколку шефот на опозицијата Алексис Ципрас ја води идната влада по изборите и доколку ја напушти политиката на буџетско штедење и не одлучи да не го намалува долгот на земјата” вели Шпигел повикувајќи се на извори блиски до владата на Германија.
Меркел и министерот за финансии Волфганг Шаубле сметаат дека отсега е сосема возможно една земја да излезе од еврозоната поради напредокот направен во рамките на еврозоната од 2012 година”, вели Шпигел. Според весникот не постои повеќе ризик за префрлање на кризата на други земји, Португал и Ирска повеќе немаат проблем и нивната економија е оздравена а постои и европскиот механизам на стабилност кој е силен и Унија на банки која обезбедува сигурност на кредитните институти.
Првата реакција на овој текст дојде од Михаел Рот кој е државен секретар за европски работи на Германија кој смета дека Грција мора да остане членка на еврозоната и дека мора да се избегнуваат изјави кои можат да донесат несакани политички и економски последици.
Пред една недела Шаубле оцени дека Грција ќе мора да продолжи со реформите без оглед кој ќе биде на власт по изборите на 25 јануари и без оглед на изјавите на Ципрас кој сака да и стави крај на политиката на штедење која е наметната од меѓународната заедница. За Шаубле нема друга алтернатива освен продолжување на досегашната политика.