„Не треба да се има премногу очекувања од самитот на ЕУ во јуни, затоа што така може да има и разочарување, но исто така никогаш не велете не.“
На минатиот самит заклучоците беа позитивни и охрабрувачки за Македонија и јас лично многу се надевам дека самитот на ЕУ најмалку што ќе даде е добра позитивна и охрабрувачка порака за Македонија, вели германската амбасадорка Гудрун Штајнакер во неделното интервју на Радио Слободна Европа
Амбасадорката Штајнакер е загрижена за слободата на медиумите во Македонија
„По ова прашање малку сум загрижена, ние видовме одреден развој на настаните во сопственичката структура на медиумите коишто не се во насока на поддршка на слободата на медиумите. Исто така, тоа што јас го видов во разговор со многу новинари е дека има присуство на некаков вид на страв, можеби тоа е пресилен збор, но повторно и повторно има новинарски текстови за различни видови притисок и тоа не е добар знак. И мислам дека, а сигурна сум дека владата е свесна за тоа, дека ова треба да се реши многу сериозно.“, вели амбасадорката Штајнакер
Во врска со протестите во скопската општина Центар, Штајнакер, таа вели дека не го разбира мотивот за нив.
„Морам да кажам дека на почетокот бев малку збунета, патував за време на викендот и се информирав на Интернет. Мислам дека протестот најверојатно беше против некои одлуки и тоа е нешто што јас не го разбирам во врска со овие демонстрации, бидејќи според моите информации и она што го гледам, морам да признаам се информирам претежно од интернет, и забележувам дека протестираат против нешто што воопшто не е ставено под знак прашалник, и тогаш се прашувам кој го организира тоа, кој е позади тие демонстрации.
Јас би сакала да знам, јас не знам, јас не сум инспектор, но мислам, јас сум загрижена за тоа што се случува таму, зошто овие луѓе протестираат против нешто што не е ни под прашање. И тие не можат да ги одговорат овие прашања, барем тоа го видов на Интернет. Јас сум малку загрижена бидејќи имам впечаток дека има манипулација во позадина на ова, но „што, како и кој“, јас не знам, но тоа оди веќе далеку, новинари се лично напаѓани, уништен е имот и мислам дека тогаш властите, надлежните власти, а тоа е Министерството за внатрешни работи и полицијата треба да реагираат адекватно и да истражат што точно се случува“, вели германската амбасадорка во интервјуто на Радио Слободна Европа.