Европската комисија (ЕК) се уште не е сигурна што треба да напише во својата февруарска стратегија за Македонија. Дали да напише дека до 2025 година земјата ќе биде “добро напредната на ЕУ патот” или дека “преговорите (за членство) треба да бидат во напредна фаза”.

Извадоци од нацртот на стратегијата на ЕК за Балканот вчера објави сајтот ЕУОбсервер кој имал можност да го види документот што ќе биде објавен на 7 или 14 февруари. А денес европските комесари на својот редовен неделен состанок имаа дебата за напредокот на балканските земји.

Во стратегијата се вели дека Србија и Црна Гора би можеле да станат членки на ЕУ во 2025 година доколку покажат “силна политичка волја, испорачаат вистински реформи и трајни решенија за кавгите со соседите”.

Но околу Македонија, Албанија, Босна и Косово, Брисел не е сосема сигурен дали овие земји или некоја од нив, ќе успее до 2025 година да почне преговори за членство. Па така, во нацртот се уште не е решено дали ќе пишува дека Македонија во 2025 година ќе биде “добро напредната на ЕУ патот” или дека “преговорите (за членство) треба да бидат во напредна фаза”.

Комисијата во февруари ќе потврди дека 2025 година е рокот за новиот бран на проширување доколку балканските нерешени соседски проблеми бидат решени.

“Партнерите од Западниот Балкан сега имаат историска можност. За прв пат, нивното зачленување добива временска рамка”, вели документот.

И во оваа прилика, како и повеќе пати досега, Брисел повторува дека ЕУ нема намера да ги увезува билатералните спорови коишто можат да го успорат овој амбициозен рок фиксиран во 2025 година.

Накусо, пораката на Брисел до Македонија е дека треба да се реши спорот со Грција и дека е потребна силна политичка волја и испорачување на вистински реформи за да можеме да се надеваме дека до 2025 година ќе ги привршуваме преговорите за членство во ЕУ.

“ЕУ не може и нема да увезува билатерални спорови. Оттука сите западно-балкански партнери мораат да ги решат овие кавги и тоа итно”, вели нацртот на стратегијата.