Што сакаше да каже комесарот Јоханес Хан со својот “твит” испратен синоќа веднаш по крајот на преговорите во Брисел на кој учествуваа четворицата македонски политички лидери?
Доцна синоќа Хан напиша: „Сè уште нема конечен договор во преговорите за БЈР Македонија. Мошне сум разочаран од недостигот од одговорност и лидерство кај некои“.
Зборот “некои“ остана без точен одговор на Твитер синоќа но остана без прецизен одговор и кога прашањето денес беше поставено на редовниот брифинг на Европската комисија (ЕК).
Портпаролката на ЕК Маја Коцијанчич одговори:
“На состанокот во Скопје редица теми беа разговарани и договорени но некои останаа за дискусија за вчера. За жал тие дискусии, се уште не доведоа до договор. Ние бараме од сите партии, во интерес на граѓаните и земјата, да најдат траен политички договор и да излезат со конкретни предлози во таа насока според договорот што беше веќе направен. Некои од договорените елементи се познати како одржувањето на предвремените избори но една од точките кои не се договорени е точната организација на влада која ќе ги подготви тие избори. Ако во детали го погледнете нашето соопштение она што е клучно е дека политичките лидери ја преземаат одговорноста која е нивна и да дојдат со компромисен предлог кој ќе дозволи земјата да напредува”, рече Коцијанчич.
Според неа “има различни нивоа на одговорност кога станува збор за лидерите кои беа на состанокот и јас нема да ви дадам ниту едно име”.
ЕК сакаше да подвлече дека оваа институција не се откажува од својата улога на олеснувач во македонската криза:
“Политичките лидери треба да ја преземат одговорноста и да дојдат со предлог. Во соопштението рековме дека ЕК е подготвена да го олеснува тој процес и ние остануваме ангажирани но во овој момент нема планиран состанок.”