Штрајкот во кавадаречки Дрекслмаер продолжи и денеска. Стотина вработени од втората смена се во кругот на фабриката, барајќи менаџментот да си го исполни ветувањето и да им го исплати бонусот за работа за време на велигденските празници.
Штрајкот почна синоќа, откако преку илјада работници од третата смена ги напуштија халите и излегоа надвор, одбивајќи да работат.
– Не штрајкуваа само малкумина, кои за Велигден не работеа. Ние останатите си ги бараме двете илјади денари бонус, кои ни ги вети менаџментот. Ни велат дека ни биле пресметани со последната плата, но тогаш зошто пресметки не добивме, прашува вработен во третата смена во Дрекслмаер, кој бараше да остане анонимен.
– Обезбедувањето со сила не тераше ноќеска да влеземе во халите и да почнеме да работиме. Ни се дереа на цел глас и не заплашуваа, но нема да попуштиме, рече друг вработен во Дрекслмаер.
Менаџерите на Дрекслмаер денеска не одговараа на нашите телефонски повици. Еден од нив е и Ѓорѓи Тренковски, кој денеска ги прекинуваше повиците, а потоа испрати порака дека во моментот е зафатен и дека ќе не побара подоцна. Сличен одговор стигна и од асистнентката на генералниот менаџер Љупка Ташевска. Таа рече дека чека став од менаџментот и вети оти до 14 часот ќе се јави, но тоа не се случи.
Последната информација од раководството на кавадаречки Дрекслмаер е дека во јавноста ќе излезат, откако германските газди ќе им дадат дозвола да го кажат својот став.
Вработените се жалат на малите плати во Дрекслмаер, кои се движат помеѓу 8 и 13 илјади денари за работа во викенд, во ноќни смени и на празници.
– Работиме и саботи и недели, некогаш и дополнително остануваме на работа, а ни плаќаат како да сме изработиле само 160 часа месечно, рече една работничка, која се плаши да го открие нејзиното име за да не го изгуби работното место.
Минатата недела НОВА пишуваше за оваа странска инвестиција, која беше најавувана како економски спас за вардарскиот и тиквешкиот регион.
Но, информациите за малите плати почнаа да се шират уште на стартот на работата на овој гигант во индустријата за автомобилска електрика.
Ова не е прв штрајк на вработените во Дрекслмаер. Минатиот месец стотина работници од Велес одбија да заминат на работа поради тоа што наместо два, раководството им пуштило само еден автобус во кој требало да се качат сите работници.