Шведска врши шпионажа против Русија и ги снабдува САД со важни податоци за руското политичко раководство. Овие податоци доаѓаат од документите од американската Агенција за национална безбедност (НСА) до кои дошол пребегнатиот американски разузнувач Едвард Сноуден, јавува дописникот на МИА од Гетеборг.
Делови од споменатите документи ги обелодени програмата на Шведската телевизија „Задача Истражување“, а кои откриваат колку значаен партнер била Шведска за САД во нивните напори да ги шпиунираат руските лидери.
Документите откриваат дека САД сметаат оти шведскиот Одбрамбен радиозавод, ФРА, е нивен водечки партнер во шпионските активности против Москва.
Во еден документ од април годинава стои дека ФРА, меѓу другото, ја снабдува НСА со ексклузивен материјал кога станува збор за руските лидери и политичари. Во документот исто така се потенцира дека разузнувачките информации кои Шведска ги насочува кон САД се од таков квалитет што не би можело да се обезбедат на друг начин.
Во еден друг документ се наведува на каков начин НСА треба да им изрази благодарност на шведските колеги за нивната континуирана работа – и едновремено да се нагласи колку е значајна ФРА во натамошните активности на регистрирање на електронски податоци и контрашпиунажа.