Владата на Шведска ќе започне тригодишно истражување на нејзините граѓани, за да истражи сознанија дека постои намалување во сексуалната активност.
Министерот за здравство, Габриел Виксторм рече дека поминале 20 години од последното истражување за сексуалните навики во земјата, но во последно време весниците објавувале дека Швеѓаните имаат помалку секс, јавува онлајн весникот „Политико“.
Целта на новото истражување е да се дознае дали ова е вистина и доколку е, зошто е тоа така.
Тој додаде дека стресот може да е фактор.
„Иако во целото наше општество навидум сексот е насекаде, во рекламите и социјалните медиуми, па и во голем дел од секојдневниот живот, темата е се уште обвиткана со срам, и отсуствува од политичката дебата“, додава тој.
Според него, сексот не е ниту пак некогаш бил, чисто приватна работа.
„Сексот исто така е тема на човековото здравје и од таа перспектива ова е политичка тема“, додава Виксторм.
Студијата ќе биде изработена од Шведската јавна здравствена агенција, а финалниот извештај се очекува да излезе во јуни 2019-та година.
Последната студија за сексуалните навики на Шведска беше направена во 1996-тата, а резултатите беа објавени во 2000-та година.