Синдикатот на македонската дипломатска служба денеска излезе на, како што тие го нарекуваат, предупредувачки протест пред Министерството за надворешни работи да укажат дека е потребен професионализам во “деградираното“ МНР.
Имено како што велат претставниците на Синдикатот, Министерството е целосно деградирано преку партиско преземање и вршење на надворешно-политички активности, катастрофална кадровска политика на амбасадорско ниво, катастрофална кадровска политика во централата во Скопје и институционално нефукционирање на МНР како и антидемократијата во меѓучовечките односи.
Тие потенцираат дека раководството на МНР веќе неколку години се однесува недолично, некооперативно и игнорантски на реакциите и барањата на Синдикатот на македонската дипломатска служба, што не соодвестува со практиката во ниту една нормална демократска држава.
За репрофесионализација на дипломатската служба тие денеска побараа најитно да се стават во мирување сите измени на постојниот Закон за надворешни работи од 2008 година наваму и подзаконските акти донесени врз основа на тие измени а да се врати оригинерниот текст на Законот од 2006 година.
Синдикатот бара што поскоро да бидат повлечен Законот за административните службеници и Законот за вработените во јавниот сектор донесени во 2014 година, и враќање на Законот за државни службеници од 2000 г. во неговата оригинерна форма со цел избегнување потполна зависност на вработените од актуелниот министер на чело на институцијата.
Во својот говор пред медиумите, претседателот на Извршниот одбор на Синдикатот на македонската дипломатија, Сашко Тодоровски рече дека овој протест е преседан во македонската дипломатија, и дека носи јасна порака.
– Сакаме да го искористиме уставното право за да го изразиме незадоволството поради кое сме доведени во ваква состојба. Протест на дипломатите е преседан во 53-годишното постоење на оваа служба. Ние моравме да се одлучиме на ваков чекор затоа што на барањето за дијалог со Министерството за надворешни работи наидувавме на молк, објасни Тодоровски.
Тој се осврна на ингеренциите на економските промотори, кои вели, имаат поголемо овластување од дипломатските претставници.
– Кога економските промотори се пожалија на висината на надоместокот за сместување, Министерството им излезе во пресрет и веднаш со законски измени им дозволи неограничен лимит за надоместокот за сместување. Тоа не важни и за дипломатските претставници низ светот. Со тоа Македонија создава посебна дипломатска мрежа, која е паралелна со официјалната предводена од МНР, потенцираше тој.
Во име на дипломатите, Тодоровски порача дека доколку не наидат на внимание од Министерството за надворешни работи, тие ќе го радикализираат својот следен потег.