Режимот на Башар ал Асад, еден ден пред истекот на рокот ја предаде листата со локациите на складиштата каде што се чува сиријскиот смртоносен арсенал, јавува АП. Воедно тоа беше и главниот услов во договорот со САД и Русија за уништување на сиријското хемиско оружје.
Од Организацијата за забрана на хемиско оружје, поддржана од ОН, велат дека добиле неколку податоци за сиријскиот арсенал и истакнуваат дека Сирија нора да ги исправи недостатоците до следната недела со што би се покренала операција за отстранување на хемиското оружје, како би се спречила воена интервенција од САД.
Портпаролот на организацијата сеуште нема потврдено што недостасува, додека дипломатите тврдат дека листата е прилично долга.
Извршниот совет на организацијата ќе одржи состанок на почетокот на следната недела со што би го разгледале списокот кој го добиле од Дамаск и да одлучат за примената на дговорот помеѓу САД и Русија, според кој Сирија би требало целиот свој арсенал да го уништи во рок од девет месеци.
Истовремено, американскиот државен секретар Џон Кери, изјави дека разговарал преку телефон со шефот на руската дипломатија Сергеј Лавров по прашањето за „острата“ резолуција која би требало да ја донесе Советот за безбедност на ОН, за отстранување на хемиското оружје на Сирија.
„Разговаравме за соработката на која двајцата се согласивме дека треба да се продолжи, и да одиме не само на тоа да Сирија ги усвои правилата на Организацијата за забрана на хемиско оружје, туку и да донесеме цврста и остра резолуција во Советот за безбедност на ОН“, изјави Кери.