Секоја американска воена акција против Сирија ќе претставува “поддршка за Ал Каеда и нејзините филијали”, соопшти Дамаск, јавува ББЦ.
Сирискиот заменик-министер за надворешни работи Фаисал Мекдад, исто така, изјави дека вооружените групи поддржани од Америка го користеле хемиското оружје –а не сириските војници.
САД претходно изјави дека има докази дека Дамаск го користел нервниот агенс сарин во смртоносниот напад минатата недела.
Американскиот претседател Барак Обама вети дека ќе преземе казнени мерки, но сака Конгресот да гласа за ова прашање во прв план.
Американските законодавци повторно се состануваат следната недела, додека официјални лица од Белата куќа изјавија дека тие веруваат дека ќе го поддржат претседателот.
Претходно, шефот на американската дипломатија Џон Кери излезе со тврдење дека имаат докази дека во случајот со нападот со хемиско оружје кај Дамаск е употребен отровниот гас сарин.
Тестовите на коса и на крв се позитивни „на траги од сарин“, изјави американскиот министер Џон Кери за телевизиите Ен-Би-Си и Си-Ен-Ен, зборувајќи за нападот со хемиско оружје на 21 август, во близина на Дамаск во кој, според американски наводи, загинаа 1.429 лица.
Тој нагласи дека се работи за резултати од независна истрага на примероци на крв и коса, коишто ги добиле од спасители кои се нашле на местото на настанот, а не од инспекторите на ОН.
Според Кери станува збор за „многу важен развој“, за кој американската влада дознала „во изминатите 24 часа“. Шефот на американската дипломатија од Конгресот побара да и‘ даде зелено светло на Владата за воен напад врз раководството во Дамаск и изрази убеденост дека пратениците ќе гласаат „ЗА“. Во случај Конгресот да гласа со НЕ, според Кери „Претседателот има авторитет да дејствува, но Конгресот ќе го направи тоа што мора“.