Специјалното Јавно обвинителство со поднесок што во текот на денешниот ден ќе биде доставен до Основниот суд Скопје 1 Скопје, се откажа од обвинителниот акт за предметот познат во јавноста како „Пуч“, соопштија од обвинителството.
Од СЈО велат дека се повлекуваат од предметот „Пуч“ од причина што фактичката состојба прикажана во обвинителниот акт е во спротивност со доказите со кои тие располагаат и со наодите во истражните постапки „Таргет“ и „Тврдина“.
„Ваквата наша одлука е со цел да се приберат дополнителни докази што во целост ќе ја разјаснат фактичката состојба и ќе овозможат донесување на правилна и законита јавнообвинителска одлука.
Појаснуваме дека, во насока на професионално работење, ние не може да застапуваме обвинителен акт кој е во спротивност со доказите со кои располагаме и истрагите отворени од наша страна. Воедно укажуваме дека со откажување од обвинителниот акт во предметот „Пуч“ ние не прејудицираме дали некој е невин или виновен, туку сметаме дека за целосно и точно утврдување на фактичката состојба, потребни се дополнителни докази, кои не можат да бидат прибавувани во фазата на главна расправа“, се вели во соопштението на СЈО.
Покрај Заев и Верушевски во случајот „Пуч“ се обвинети и Соња Верушевска, Бранко Палифров од општина Струмица и Звонко Костовски кој е засега единствениот кој беше осуден за шпионажа и неовластено прислушкување.