Специјалното јавно обвинителство на денешната прес-конференција, како што соопшти шефицата на обвинителството, Катица Јанева, денеска најави дека спровеле седум нови истраги, против 17 лица кои се товарат за злоупотреба на службената должност и за измама во службата, како и за други кривични дела.
Првата истрага која ја најави обвинителката Фатиме Фетаи е со кодно име „Странски служби“, а отворена е против две лица поради сомнение дека сториле кривично дело „злоупотреба на службена положба и овластување“. Едниот бил директен извршувач, а другиот поттикнувач.
Според истрагата, во 2014 година во октомври и ноември по барање на еден од осомничените, кој тогаш бил началник на Одделот за оперативна техника во УБК, странска компанија изготвила извештај во кој било наведено дека на подрачјето на град Скопје, со своја опрема детектирале нелегални активности поврзани со дупли базни станици.
Ваквиот извештај требало да ја потврди тезата на тогашниот државен врв дека масовното незаконско прислушување го извршиле странски служби. Интерес за овој извештај имала и странската компанија, рече Фетаи.
Во декември 2014 година, месец по изготвувањето на извештајот, компанијата надвор од законот за јавни набавки, преку дејствијата на двајцата осомничени, го добила тендерот за набавка на опрема за потребите на МВР.
Постапката по оваа јавна набавка е по иницијатива на вториот осомничен, началникот, кој побарал да се спроведе набавка, а второ осомничениот донел одлука и формирал комисија за спроведување на јавната набавка. За пет дена била средина целата работа.
Опремата била донесена во мај 2015 година и била инсталирана.