„СЈО ја одигра својата улога во еден транзициски период и отвори смело многу предмети – сега со реформите во правосудниот систем, Обвинителството се оспособува ефикасно да го гони криминалот и високата корпуција“, рече академик Владо Камбовски кој учествува на консултациите во Министерството за правда, на кои се подготвува новиот Закон за јавно обвинителство со кој се предвидува сите предмети, истраги и обвиненија на СЈО да преминат во рацете на државниот јавен обвинител Љубомир Јовески, по писмото испратено од Јанева.
Камбовски додава дека и кога се формираше Специјалното јавно обвинителство, имаше временски рок до кога законски може да функционира.
„Мандатот на СЈО можеше да се продолжи доколку наследникот на Јанева се избереше три месеци пред истекот на нејзиниот мандат. Но, тоа не се направи затоа што се планираше токму Јанева да го продолжи мандатот. Кога тоа не се случи, а Јанева е приведена, со истекот на нејзиниот мандат на 15 септември, ќе се попречи работата на СЈО, затоа што според Законот за СЈО, само таа може да делегира и одзема овластувања на обвинителите во СЈО“, објаснува Камбовски.
Тој го поддржува решението со кое предметите на СЈО треба да преминат во Јавното обвинителство и вели дека за тоа има законска основа.
„ Државниот јавен обвинител има овластување според уставната поставеност на Јавното обвинителство која е заснована на хиерархиска субординираност, да презема предмети од други обвинителства. Тоа решение треба да се реализира и според мое мислење предметите треба да се доделат на обвинителите од СЈО“, рече Камбовски.
Доколку пратениците не дадат поддршка на ова решение, друга варијанта е СЈО да се припои кон Обвинителството за организиран криминал, како што е предложено во Законот кој е доставен до Собранието, да се избере нов специјален обвинител и СЈО да продолжи да ги води предметите.
Со ова решение – да се припои СЈО кон Обвинителството за организиран криминал, не се согласуваше опозицијата која инсистираше Државниот јавен обвинител да ги преземе предметите во фаза во која што се – фаза на разгледување докази, распит на сведоци, завршни зборови, жалби пред Апелација.
Но, според вчерашната изјава на лидерот на ВМРО ДПМНЕ Христијан Мицкоски, тој сега не се согласува ниту предметите да завршат кај Јовески.
„Вчудоневидени за страста за работа на Катица Јанева, па макар и прекувремено, гледаме писмо каде таа наредува случаите да се предадат на работа кај Русковска обвинителството. Со други зборови, да се чуваат на посигурно за да се задржат конците за политички притисок врз опозицијата. Значи, од еден сеф на СДСМ, во друг сеф на СДСМ. А пустите така мислат дека ќе нѐисплашат. Но и за ова се лажат”, изјави вчера Мицкоски.
Попладнево во Собранието е закажана нова средба на работните групи меѓу власта и опозицијата за новиот Закон за јавно обвинителство.