За дополнителни градежни работи за довршување на новиот објект на Јавното обвинителство и Финансиската полиција, кој што се гради покрај реката Вардар во центарот на Скопје компанијата „Бетон“ добила 23.097.551 денари или над 370 илјади евра.
Со тоа, вкупниот износ што македонската влада го има платено со буџетски пари е над 14 милиони евра.
Се работи за договор од пред два месеци меѓу Бетон и Службата за општи и заеднички работи на македонската влада, пишува порталот Билд.
Се работи за изведбени активности кои не се вклучени во основниот договор, но истите се неопходни за завршување на ова здание од проектот „Скопје 2014“.
Административната зграда на Јавното обвинителство и Финансиската полиција започна да се гради во октомври 2010 година. Првичниот рок за завршување на градежните работи изнесуваше 12 месеци, но пуштањето во употреба доцни околу една и пол година.
Објектот е барокен, како и останатите градби од владиниот проект „Скопје 2014“, и се простира на површина од 9.620 метри квадратни.
Како проектант се јавува ДИГПГ „Полар“ ДООЕЛ , а надзорот го извршува Градежен институт „Македонија“ А.Д.