Скандалот не само што не се смирува туку од ден на ден се продлабочува. Францускиот претседател Емануел Макрон е на удар на острите критики на јавноста, медиумите, Парламентот поради обидите да го заштити неговиот личен телохранител откако беше откриено дека тој брутално нападнал демонстрант на 1 мај годинава. И државното обвинителство отвори истрага за настанот.
Скандалот избива на 18 јули кога весникот Ле Монд објавува видео на кое се гледа Александр Бенала, еден од личните телохранители на претседателот, со полицајска капа напаѓа двајца од учесниците на протестот на 1 мај. Негова задача била да ја набљудува интервенцијата на полициските сили на овој протест. Наместо тоа, тој не само што се претставил како полицаец туку и влече една жена по асфалтот и брутално тепа еден маж.
Бенала во петокот беше приведен, заедно со уште тројца полицајци учесници во тепањето. Но, обидот на Макрон да го премолчи случајот пред јавноста предизвика бура реакции и фрлаат сомнеж во начинот на којшто функционира Елизејската палата и блиските соработници на претседателот.
По објавувањето на видеото, новинарот на Ле Монд побарал реакција од Елизејската палата и му било одговорено дека Бенала бил санкциониран поради тоа однесување со 15 дена суспензија. Оваа санкција, вели Ле Монд, не само што е многу лесна туку таа имала за цел никогаш да не биде објавена пред јавноста. Тоа кај новинарите фрли сомнеж за начинот на кој функционира врвот на државата.
Дури по два дена од објавувањето на овој скандал, претседателот Макрон конечно се решава да го отпушти Бенала. Француските медиуми велат дека тоа требало да биде направено уште во мај кога било констатирано насилничкото однесување на телохранителот. Освен тоа, медиумите откриваат дека профилот на Бенала, сомнителните лица со кои тој е близок и неговите методи одамна требало да му стават на знаење на Макрон дека овој човек нема свое место во Елизејската палата.
Задоцнетата реакција на Макрон со отпуштањето на Бенала и неговото молчење, само дотурија масло врз скандалот па така Парламентот отвори истрага. Во понеделник го покани министерот за внатрешни работи Жерар Коломб да сведочи а во вторник тој ќе мора да сведочи и пред Сенатот поради пропустите што довеле до злоупотреба да позицијата на претседателски телохранител.
Во меѓувреме Макрон останува нем за овој случај и арогантно одбива да одговори на новинарските прашања.
Според лидерот на француската опозиција од десницата, обидот на Макрон да го сокрие случајот станува државен проблем. Лидерката на екстремната десница Марин Ле Пен изјави вчера дека ако Макрон не објасни што се случило во “случајот Бенала, тогаш тоа ќе стане случај Макрон” а лидерот на радикалната левица Жан- Лук Меланшон случајот го спореди со американскиот Вотергејт и го обвини претседателот дека “организира приватна милиција”.
Згора на тоа, пратениците од движењето Макрон се спротивставија на барањето на пратениците од другите политички групи за отворање пред јавноста на парламентарната истрага за овој случај. Но другите пратеници инститираа сведочењата пред Парламентот да бидат отворени на јавноста.
Француските медиуми потсетуваат дека една од основните заложби на Макрон, за време на неговата кампања во 2016 година, било токму да се реформира начинот на владеење во Елизејската палата и одговорното владеење да биде пример за сите други нивоа на власта. Аферата Бенала се претвора во криза.
“Имаме власт која, очигледно, одбра да штити едно лице поради неговата блискост на првиот круг на “Макронија” и со презир гледа врз почитувањето на законот и правилата. Ова открива серија проблеми во Елизејската палата кои имаат реперкусии во низа”, вели Ле Монд и додава дека министерот за внатрешни Коломб и неговите високи функционери, кои биле во тек со настанот, не го известиле судството а молчела и париската полиција која исто така била во тек. Според Ле Монд, Макрон владее на хипер-централизиран начин во кој најважно е да се биде лојален.