На социјалните мрежи кружи фотографијата од учебник за четврто одделение од авторката Биљана Живковиќ , каде што стои ваква формулација:
„Разликата помеѓу живата и неживата природа.
Неживите организми… Каменот, почвата, водата не живеат. Тие ја сочинуваат неживата природа и од нив зависи целиот жив свет“.
Но, ова е само еден пример на нелогичности и грешки кои можат да се најдат во македонските учебници за основно и средно образование.
Еве и други:
„Шекспир потекнува од Шпанија“,
„Црногорските градови Улцињ и Бар биле делови на Албанија“,
„Античките Македонци се повлекле во планините и станале Власи“,
„Селаните припаѓале на феудалната хиерархија“.
Во учебникот по предметот „Запознавање на околината“ за второ одделение, на децата на возраст од седум години им се даваат инструкции ка¬ко да го задржат воздухот, за да видат колку долго можат да издржат без кислород.
“Затвори ја устата и затни го носот. Изброј колку време можеш да издржиш без воздух “, е експериментот кој им се препорачува на второ одделенците во учебникот по запознавање на околината, за да го откријат значењето на воздухот за животната средина.
За овие скандалозни грешки во учебниците, од Министерството за образование и наука велат дека учебникот од Биљана Живковиќ бил одобрен во 2009 година и дека досега немало забелешки за неговата содржина, ниту од наставниците, ниту од родителите.
Инаку, Министерството веќе работи со британскиот Универзитет Кембриџ на превод на учебници за основно и средно образование што ќе биде долгорочно решение на проблемот, а не поединечно да се решава случај по случај, вели за НОВА, Емилија Јовановска од Министерството за образование и наука.