Според најновите податоци на Министерството за животна средина, Скопје и Тетово се најзагадените градови. Граѓаните веќе шест дена по ред се гушат поради загаденоста во Скопје која е над дозволеното. Град Скопје излезе со препораки и мерки од прв степен, но граѓаните велат во практика тие се невозможни. Отворање на прозорците во домовите барем на кратко е потреба, а излегувањето на улица неизбежно. Скопјани стравуваат по здравјето, а некои од нив, решението го гледаат во работата на политичарите, и итно повикуваат на конкретни мерки од нивна страна.
Постарите стравуваат за помладите во семејството, но велат, тие мора да излезат поради секојдневните потреби, а сепак стравуваат за своето здравје.
„Вдишувањето на загаден воздух влијае неповолно на здравјето на луѓето, и тоа на сите возрасни популации. Најмногу штетни последици можеме да очекуваме кај младите, и кај постарите кои се соочуваат со повеќе од една болест“, вели за НОВА, пулмологот Др. Деска Димитриевска.
Според Димитриевска, несаканото дејство може да се одрази на два начина, акутно, кое се чувствува веднаш, и последователно, односно со хронично заболување.
-Првите симптоми кои што луѓето ги чувствуваат се различни нелагодности, односно печење, жарење, чувство на тешкотии при дишењето, кашлица, солзење на очите…а може да настане и акутно воспаление на дишните патишта, бронхити, дури и до воспаление на белите дробови, вели Др. Димитриевска.
Таа предупредува дека маските не се правиот механизам за заштите од загаден воздух, а таквите имрпвизации се непопуларни мерки.
Она што е најзагрижувачко сепак, е што за поголемиот дел од државата нема податоци за состојбата со загадувањето на воздухот, бидејќи мерните станици не работат, а има многу места на кои што и воошто ги нема.
Нелвадините остро реагираа, а организациите „Гоу Грин“ и „Млади за љубов“ ги повикуваат граѓаните на протести со гас-маски утре во 12 часот пред котларата во Клиничкиот центар, сметајќи дека таа е еден од најголемите загадувачи во центарот на Скопје.
На денешната седница на Собранието, реагираа и пратениците на СДСМ. Според пратеникот Јани Макрадули врв на лицемерието е изјавата на градоначалникот на Скопје, Коце Трајановски дека за почист воздух потребно е Скопје да се гасифицира, потсетувајќи дека токму тој се откажа од гасификацијата.
Решението е далеку од видливо, засега никој не посочува кој се главните причинители за ситуацијата со нарушениот квалитет на воздухот во град Скопје, што остава простор за шпекулации.
Она што граѓаните го бараат е директно вмешување на институциите задолжени за мерилото на загаденост и механизмите за превенција и надминување на проблемот, а дотогаш „гушењето“ во главниот град останува единствена опција.