Денес во Скопје официјално е отворен и пуштен во употреба новиот Ист Гејт Мол, инвестиција вредна над 103 милиони евра. Вратите на новиот Ист Гејт Мол се отворени за сите посетители, од земјава и регионот. Новиот модерен трговски центар претендира да биде не само неодминлива станица на сите жители на Скопје и цела Македонија, туку и најголема шопинг дестинација во регионот.
„Со гордост ви посакуваме добредојде на отворањето на најголемиот трговски објект во историјата на оваа земја и еден од најдобрите трговски центри на Балканот. Сè започна со сонот за создавање на нова генерација на европски трговски центар на високо ниво, којшто овозможува работни места за над 1500 луѓе и за којшто сме сигурни дека ќе биде референтна точка не само за градот Скопје туку и за голем дел од балканскиот регион.“, изјави Сотирос Јанакудакис, менаџерот на Ист Гејт Мол по повод неговото денешно отворање.
Објектот на Ист Гејт Мол е лоциран на само 5 минути од центарот на градот и веднаш до автопатот М4, а создаден е со помош од над 2.500 вработени. Целиот трговски гигант се протега на 5 нивоа и вкупна површина од околу 160.000 квадратни метри, од кои 57.000 квадратни метри е простор за закупување. Во склоп на трговскиот центар има 2000 паркинг места и 220 продавници кои нудат над 600 брендови, од кои 40 за прв пат се претставуваат во земјава. Меѓу многубројните брендови во молот отворена е најголемата Zara продавница на Балканот како и бројни препознатливи имиња Reserved, House, Armani Exchange, Calvin Klein, Pandora, Pepe, Valentino, De Facto, Massimo Dutti и многу други.
„Ист Гејт Мол од денес за 360 степени го менува концептот за она што претставува еден трговски центар во секое време од годината и со тоа станува најпривлечна дестинација и за посетители од блиското соседство. Одговорноста да се отвори навремено Ист Гејт Мол е голема, а секако е навистина значителен успех и мое лично задоволство да се биде на чело на палката во менаџирање на почитување на сите рокови и правила во изградбата на овој прекрасен објект. Од денес, Ист Гејт Мол е центар на шопингот и забавата, како најновиот магнет за сите домашни и регионални посетители, кои со нетрпение ги очекуваме да им посакаме добредојде.“, истакна Игор Давков, главниот извршен директор на компанијата Скопје Ист Гејт по повод денешното отворање.
Ист Гејт Мол е инвестиција на Балфин Групацијата чие портфолио опфаќа многубројни сектори а присутна е на австрискиот, албанскиот, косовскиот, босанскиот, македонскиот, холандскиот и црногорскиот пазар.
Инвестицијата на целокупниот проект Скопје Ист Гејт изнесува 350 милиони евра.
Марија Поповска