Десет уметника, десет разладни уреди, десет уметнички дела. Најдобрите македонски улични артисти ќе ја заменат својата стандардна подлога за цртање со фрижидери во рамки на проектот Red Bull Curates, кој ќе се одржи за време на 11 и 12 јуни како дел од Skopje Street Fest. Посетителите на фестивалот ќе можат во живо да гледаат како се создаваат уметничките дела, а ќе имаат и можност да гласаат за најдобро насликан фрижидер.
Red Bull Curates е проект за сите оние кои се инспирирани од Жан Мишел Баскијат и од неговите почетоци како уметник со графити, кој што освен на ѕидовите, сликал и по фрижидерите и мебелот на своите пријатели, за потоа да биде признаен како еден од најзначајните авангардни уметници на Њујорк од седумдесеттите и осумдесеттите години.
Свеста за денешната позиција на современата уметност во Македонија, особено не толку лесната позиција на уметниците од помладата генерација, беше мотивација за Ред Бул да го награди нивниот придонес кон културната сцена преку најавениот уличен фестивал.
Посетителите ќе имаат можност да видат десет реномирани уметници од помладата генерација кои во рамките на Red Bull Curates ќе стават свој авторски печат на фрижидерите.
Тие се претставници на креативните сили кои преиспитувајќи го својот визуелен јазик, и даваат смисла на средината во која што живееме. Стручното жири избра осум уметници, а за преостанатите две места можат да конкурираат сите заинтересирани така што ќе се пријават на Facebook страницата насловена Red Bull Curates Skopje. Се што е потребно да се направи е да се постават слики од своите трудови до петти јуни, со што ќе аплицираат за учество.
По завршувањето на Skopje Street Fest, уметничките дела ќе бидат изложени низ клубовите во главниот град на Македонија.
„Ја повикуваме публиката на фестивалот да гласа од 12 до 18 јуни преку апликацијата на SSF, за најдобро дело во рамките на Red Bull Curates проектот. На крајот сите дела ќе бидат изложени во локалот „Кино Карпош“, на улица Благој Давков бр. 2, велат организаторите.
Публиката ќе има можност да гледа во живо како настануваат уметничките дела на 11 јуни, да разговара со авторите, но и да даде глас за своите фаворити. Изложбата ќе биде отворена до 18 јуни, кога ќе биде прогласен и победникот, вечерта во 20 часот.