Раководството на скопска МЗТ Леарница преку соопштение вели дека вработените кои со денови штрајкуваат пред државните институции поради неисплатени плати не ја кажувале вистинската за проблемот. Според раководството проблем е ниското остварување на бизнис планот и злоупотреба на работните места преку неизвршување на зададените задачи од страна на вработени.
-Одборот на директори и менаџментот јасно им ставија до знаење на Синдикатот и вработените дека времето на неодговорност, некомпетентност, уцени, манипулации е завршено, дека ќе дојде нов инвеститор кој ќе изврши строга селекција на сите вработени по сите основи и дека само оние што можат да ги исполнат строгите критериуми и ќе бидат во можност да ги исполнат плановите по обем, рок и квалитет, ќе можат и понатаму да работат во МЗТ Леарница АД Скопје.Значи главниот проблем е вониското остварување на бизнис планот.
Праксата на неодговорност, уцена пред секоја испорака на стоката, неквалитет, доцнење на испораките, непочитување на наредбите, искористување на работното време од околу 50 проценти, намерното уништување и оштетување на постројките, крадење на производи, модели и резервни делови се ближеше пред својот крај. Ова исто така се однесува и на високите плати ( до 45.000,00 денари во производство), несоодветни за тој вид на работа и образование. Ваквата состојба досега се толерираше поради две причини:
а) недостатокот на соодветен кадар и тешкотии за обезбедување на истиот (а и тој што ќе се обезбедеше беше приморан да замине под притисок од вработените)
б) поради обврските кон купувачите и настанатите штети, се вели во соопштението.
Оттаму велат дека раководството и менаџментот преземаат мерки за извршувањето на неопходните поправки и МЗТ Леарница АД Скопје ќе продолжи да работи веднаш штом опремата се доведе во нормална состојба. Најауваат и правни мерки против оние што ја предизвикале оваа состојба.
МЗТ Леарница АД Скопје е акционерско друштво каде осум акционери се правни лица, а само еден е физичко лице. Управувањето се спроведува преку акционерското собрание и Одборот на директори, а раководењето е преку менаџерски тим.
Над стотина вработени со денови протестираа пред Собранието и Владата со барање да им се исплатат задоцнетите 12 плати и придонеси.