Скопскиот фестивал кој слави полнолетство, во годинашната програма ќе понуди над 60 филма, повеќе гости, прес-конференции, како и работилници.
Оваа година фестивалот ќе го отвори новиот македонски филм „Медена ноќ“ на Иво Трајков, кој е направен во копродукција со Словенија и Чешка. Со режисерот, со главните актери Никола Ристановски и Верица Недеска, како и целата екипа, публиката ќе оствари средба на премиерата и на прес-конференцијата која ќе се одржи во сабота на 18 април 2015.
Филмовите се распоредени во десетина програми.
И годинава ќе има проекции на кратки играни и анимирани филмови, почесна програма посветена на значаен гостин, Програма на светски филм, како и Студентска програма.
Освен македонскиот филм „Медена ноќ“ на отворањето премиерно ќе бидат прикажани и три филма од регионот кои се направени во копродукција со Македонија. Тоа се бугарскиот „Пресуда“ на Стефан Командарев, во кој игра Мики Манојловиќ, потоа словенечкиот „Инферно“ на Винко Модерндорфер, и двете социјални приказни. А третиот е хрватскиот „Такви се правилата“ на Огњен Свиличиќ, во кој копродуцент е Светозар Ристовски.
Во главната програма ќе биде годинешниот добитник на „Златна мечка“, иранскиот филм „Такси“ на Џафар Панахи, кој се уште ја одлежува својата 20 годишна затворска казна.
Понатаму, ќе бидат прикажани уште филмови добитници на награди, како што е мексиканското деби на Габриел Рипштајн во чиј филм „600 милји“ игра Тим Рот, потоа полскиот „Тело“ на Малгоржата Шумовска, кој ја доби „Сребрената мечка“ за режија, како и германското деби „Викторија“ на Себастијан Шипер, кој доби награда за уметнички придонес во поглед на употребата на камерата.
Од Берлин ни доаѓа и германско-австралискиот филм „Еликсир“ посветен на бунтовните уметници, во кој игра македонската актерка Наташа Петровиќ.
Во оваа програма е и израелскиот „Судењето на Вивијан Амсалем“, потоа „Возвишен“ на Клаудија Љоса, неверојатна приказна за границите на љубовта кон своето дете, како и филмот „Турист“ на Рубен Остлунд.
Од Кан гостува еден од најдобрите филмови од минатата година, „Тимбукту“ на Абдераман Сисако.
Од Програмата на светски филм се издвојуваат францускиот трилер на Андре Тешине „Човекот што премногу љубеше“, унгарскиот „Белиот бог“ на Корнел Мундрузо и данскиот „Тивко срце“ на ветеранот Били Август.
Во програмата на авторски филм се и новиот филм на Абел Ферара, Гај Маден, Џесика Хауснер, како и „Диви приказни“ на Дамијан Шифрон.
Специјален гостин на фестивалот е големиот ирански режисер Мохсен Макмалбаф.