Музичката шема која ЈСП ја најави пред речиси три години, и онака не се почитува. Многумина од граѓаните секојдневно се жалат дека шоферите во улога на ди џеи пуштаат музика по своја волја.
Но тоа и не е толку „страшно“ во поглед на „репертоарот“ кој на граѓаните им се сервира за време на предизборната кампања.
Сега, покрај граѓаните, и шоферите во контакт со нив се жалат дека фреквенцијата им е заглавена на една радио станица – „Радио Слободна Македонија“. И наместо предвиденото, класична музика во утринските часови, а потоа и динамичен ритам со текот на денот, во речиси секој автобус се слуша платена политичка програма, односно политички говори и емисии на кои најчесто се слушаат политичарите од власта.
Барајќи одговор од ЈСП за ваквата практика, во телефонски разговор денеска ни беше соопштено дека не даваат изјави и коментари додека не завршат изборите на 27ми април, иако ништо не ги обврзува на такво нешто.
„За тоа можеме да разговараме од понеделник“, е одговорот кој го добивме од една од службеничките во ЈСП – Скопје.
Екипата на НОВА со скриена камера снимаше разговор во еден од автобусите на ЈСП, каде што шоферот отворено ни кажа дека тој нема контрола врз музиката, а единствено што останува е да го изгаси радиото.
„Поради избориве само реклами, само избори даваат“, вели еден од шоферите, објаснувајќи дека УСБ-то од каде што можат да пуштаат музика е „укинато“.
Во однос на ова прашање, помладите корисници на јавниот превоз велат досадно им е, особено кога се возат на подолги релации, а народот внатре „затруено“ разговара само за политика. Слика има на мејлов
Невладината организација „Цивил“ исто така забележува дека во јавниот превоз кој е на сите граѓани, во екот на предизборната кампања се форсира една политичка опција.
– Во рамките на злоупотребата на јавните ресурси, ја гледаме и злоупотребата која особено според принципот на нулта толеранција, е многу присутна во средствата за јавен превоз каде што забележуваме едно радио, кое е очигледно про-владино, кое емитува програма. На неа во далеку поголем обем се презентираат партиите на власт, отколку партиите во опозиција, вели Џабир Дерала за НОВА.
Тој надополнува дека во Цивил пристигнале неколку пријави од граѓаните, а истото е забележано и од набљудувачите на Цивил кои користат јавен превоз, како „агресивно и очигледно форсирање на само една партија“.
Но и покрај музичкото мени кое го понуди ЈСП – Скопје а кое не се почитува, ниту во Законот за превоз на патници, а ни Град Скопје, немаат предвидено санкции за ваков тип непочитување на Правилникот од ЈСП.