Македонија тоне во сферата на слободата на медиумите. Во најновото истражување на организацијата Репортери без граници Македонија се најде на 116 место што претсавува пад за 20 места од последниот извештај на оваа организација.
Како што се вели во извештајот падот на Македонија се случил поради произволни одземања на лиценците на некои медиуми како и поради влошувањето на амбиентот во кој работата новинарите. На 115 место пред нас е Нигерија. Косово како и некои други соседи се далеку пред нас.
„Лошиот имиџ во светот за слободата на медиумите за Македонија нема да се смени се додека Владата и политичките партии ги третираат медиумите како средство за манипулација со јавноста и како средство за политичка пресметка со противниците“, регираше денеска Насер Селмани, претседател на македонското здружение на новинари.
„Загрижувачки е фактот што Македонија во индексот најниско рангирана по слободата на медиумите од сите земји на Балканот“, вели Селмани.
За споредба, Македонија во рангирањето се наоѓа под Нигерија и пред Венецуела. Само четири европски земји, Украина, Русија, Турција и Белорусија, се подолу рангирани од Македонија. Само пред четири години Македонија беше на високото 34 место на ова листа на Репортери без граници.