„Ние, европски лешеви“ на Словенско младинско гледалишче вечерва е на репертоарот на МОТ, со почеток во 20 часот во МКЦ.
Претставата во режија на Себастијан Хорват е посветена на Жртви на бенг – бенг модата. Токму со оваа претстава се означува поставувањето на Јовановиќ за уметнички директор на Словенско младинско гледалишче, кое тој и неговите колеги го претвориле во најзначајното театарско поглавје на овие простори во минатиот век. На 60-годишнината од постоењето на театарот, Симона Семениќ , несомнено најрадикалната словенечка писателка, ќе го парафразира Жртви на бенг – бенг модата и ќе создаде нов драмски текст по кој се прави претставата.
Инаку Себастијан Хорват е еден од позначајните словенечки режисери, студирал театарска режија во Љубљана, каде што дипломирал во 1998 година со претставата Елсинор, базирана на адаптација на шекспировиот Хамлет. Во 1997 година заедно со неговите соработнички, костимографката Петра Вебер и актерката Наташа Матјашец Рошкер го формирале независниот театарски институт наречен E.P.I. центар. Денеска, тој претставува значаен центар за театарска продукција, кој соработува со институционални театари во создавањето на театарски проекти. Хорват магистрирал во 2005 година и започнал да работи на академијата во Љубљана.
Во 22.00 часот во МКЦ следи перформансот „Државата“ на Александар Мануилоф од Бугарија. „Државата“ е во рамките на МОТ+ програмата и ни претставува една конкретна предност на современото театарско – концептуално дело, разгледувајќи ги условите на претставата, која сепак ја користи моќта на нарацијата да се осврне на реалните политички прашања.
Александар Мануилов е писател, драматург и сценарист од Бугарија. Тој е првиот бугарски автор што бил поканет со текст на еден од најголемите и највлијателните европски театарски фестивали, Theatertreffen (2015), во целата историја на фестивалот од повеќе од половина век. Драматуршките дела и филмовите на Александар се прикажани на некои од најважните театарски и филмски фестивали во Европа и пошироко, како што се Temps d’Images, Globalize: Cologne во Келн, Prague Quadrennial во Прага, Teszt, Лето во Варна, како и на Меѓународните фестивали на независен филм во Мадрид, Солун и Истанбул, Фестивалот на документарен филм во Москва, Фестивалите на независен филм во Кан, Мајами и Лос Анџелес. Неодамна беше повикан да биде дел од најновиот проект на германската театарска трупа Римини протокол. Пишува за ТВ серии во во Берлин и развива театарски проект за независната сцена во Минхен.
Повеќе информации за програмата на 41.издание на МОТ на следниот линк.