Заштита на докторите додека пружаат медицинска помош и добивање на статус на службени лица бара Лекарската комора од државата. Ваквата реакција доаѓа, како што велат заради зачестеното агресивно однесување на пациентите кон лекарите, особено со последниот случај каде син на пациентка, претепа доктор на Клиниката за гастроентерохепатологија.
-Популацијата е хиперадренализирана, на социјалните мрежи се шири говор на омраза против докторите по последниот случај на напад врз доктор и тоа мора да престане. Затоа бараме статус на службени лица со што ќе бидеме заштитени како што е во Финска, Данска и Израел. Зарем треба да биде убиен лекар како што беше случајот со хирургот во Краљево? Нашето трпение е при кај, изјави денеска Кочо Чакаларовски претседател на Лекарската комора.
Во комората велат дека три проценти од лекарите во Британија задолжително треба да знаат некоја од вештините како што е џиу-џит-су на пример, за да можат да се одбранат. Беше посочен и пример на лекар на Клиниката за нефрологијата кој барал од директорот да му дозволи да доаѓа на работа наоружан.
Комората веќе доставила барања до директорите на клиниките да обезбедат заштита на медицинскиот персонал, но велат од таму нема никаков одговор. Признаваат дека има и лекари кои се однесуваат несоодветно или не се заинтересирани во време кога семејството чувствува болка кон блискиот, затоа апелираат на трпение од двете страни.
Во Лекарската комора не сметаат дека причината за засилената агресија кон лекарите треба да се бара во здравствениот систем, во долгите административни процедури. Од таму велат дека станува збор за нарушена доверба меѓу лекарите и пациентите, но и фактот дека од терцијалното здравство повеќе не може да се очекува услуга како досега бидејќи истите работи се прават во болниците, односно во секундарното здравство.
И Синдикатот на скопските клиники го осудува нападот на лекарот и бараат да се спроведе законот за Здравствена заштита во член 171, каде се вели дека лекарот има право на заштита доколку кон него се упатени навреди и закани, болницата каде што работи е должна да му ја обезбеди.
Инаку, случајот кој вчера го објави НОВА, ја крена на нозе македонската јавност и во исто време ја подели. Додека едни се згрозени од агресивното однесување на 35 годишниот Филип Стојановски кој денеска ја погреба мајка му, многу од граѓаните го оправдуваат и охрабруваат ваквото однесување.
Со случајот се запознаени и во МРВ, каде што Стојановски пријавил напад врз неговиот татко, кој како што тврди бил малтретиран од три лица од обезбедувањето кои го удирале за да го натераат да го доведе синот.
-Имаме пријава дека три лица го нападнале неговиот татко, го туркале и слично, така што ние работиме на расчистување кои се тие луѓе, дали навистина станува збор за службени лица од обезбедувањето, изјави за НОВА Иво Котевски портпарол на МВР.