Белата куќа е “многу разочарана” дека на протекувачот на Агенцијата за национална безбедност Едвард Сноуден му е дозволен привремен азил во Русија, изјави портпаролот на Белата куќа, јавува Си-Ен-Ен.
Сноуден има правен статус во Русија за една година, изјави претходно неговиот руски адвокат Анатолиј Кучерена, додавајќи дека неговиот клиент го напуштил московскиот аеродром.
Неколку саса подоцна, портпаролот на Белата куќа Џеј Карни зборуваше за најновите вести на прес-конференција.
САД во меѓувреме го преиспитува планираниот состанок меѓу американскиот претседател Барак Обама и рускиот претседател Владимир Путин, следниот месец во Москва, пред Г-20 собирот во Санкт Петербург, рече тој- “Ние ја оценуваме полезноста на самитот.”
Во интервју за државната руска ТВ 24, Кучерена рече дека Русија “немала избор” во доделувањето на азил на неговиот клиент.
“Тоа беше хумана одлука, бидејќи Едвард не можеше да дојде и самиот да купи билети во Хавана или било која друга земја, бидејќи тој нема пасош”, изјави адвокатот на вестите на ТВ 24. “Значи, Русија се однесува многу чесно во оваа ситуација”, додаде Кучерена, кој вели дека не е во ред да се наметнуваат санкции против Русија.