-Пред четири години на Антикорупциската комисија и го дадов како доказ мојот телевизиски прилог (во Алфа ТВ, наша заб.) во кој сопственикот на леарницата Арте Бронзо од Верона, вели дека наместо 8,5 милиони евра, неколку споменици од Скопје 2014 ќе ги изработел за 2,7 милиони евра, пишува Милка Смилевска, новинар во Ал Џазеира за Порталот “Фактор”
“Скулпторот Андреа Пизани беше шокиран од висината на сумата што општина Центар ја плаќа на леарницата Фердинандо Маринели од Фиренца. Се излеаа два пара лавови, спомениците на Гоце Делчев, Даме Груев, Никола Карев и рељефите на фонтаната во центарот на Скопје. Пизани во телефонскиот разговор велеше дека три пати повисоката сума што ја добил неговиот колега е неверојатна!
– Не знам како властите од Скопје ги платиле овие пари. После ова слободно можат да ја затворат леарницата – се чудеше италијанскиот леар”, пишува Смилевска.
Новинарката на Ал Џазеира, која овој потег го направи кога беше новинар за Алфа ТВ, потсетува дека за истражувањето и понудувањето докази не се чудела тогашната прва антикорупционерка Мирјана Димовска, ниту го отворила случајот, ниту истражила дали општина Центар го има злоупотребено буџетот, затоа што дала многу повеќе јавни пари за споменици, кои можела да ги купи за помала сума.
Сепак, адвокатот Драган Малиновски, во 2009, од позиција на поранешен член на Антикорупциската тогаш изјавил дека регулаторното тело треба веднаш да го испита случајот со леењето на скулптурите за неколку пати повисока цена. Малиновски рекол дека некој треба да одговори зошто склучил штетен договор од 8,5 милиони евра, пишува Смилевска.
-Ревизијата што ја најави градоначалникот Андреј Жерновски ќе покаже дали имало злоупотреби и дали антикорупциската комисија и обвинителството треба да спроведат подлабока истрага како се трошеле јавните пари, вели Смилевска за Фактор.