Едвард Сноуден е поканет од Комитетот за граѓански слободи да открие детали за американската шпионска програма.
Комитетот за граѓански слободи на Европскиот парламент денеска го покани поранешниот американски разузнавач Едвард Сноуден да сведочи преку видео-линк за шпионската пракса на САД.
Членовите на комитетот со големо мнозинство претходно го одобрија предлогот за сведочењето на Сноуден. За предлогот Сноуден да сведочи преку видео-линк гласаа 36 членови на Комитетот за граѓански слободи на Европскиот парламент, додека двајца беа против.
Во Парламентот за овој предлог на комитетот ќе се гласа во февруари, па за евентуалното сведочење на Сноуден може да стане збор во април.
Сноуден во јавноста откри дека американската Национална безбедносна агенција шпиoнирала лидери на ЕУ и остатокот од светот, и заради тоа во моментов, со одобрен привремен азил, престојува во Русија.
Светскиот печат, врз основа на тајни документи што ги објави Сноуден, соопшти дека Вашингтон, со помош на сојузниците како Велика Британија, прислушуваат и шпионираат телефонски и интернетски системи ширум светот. Меѓу другото, јавноста на тој начин дозна дека НСА дури го прислушувала и мобилниот телефон на германската канцеларка Ангела Меркел.