– Не постојат законски мерки со кои би се спротиставиле на масовниот надзор, рече денеска протекувачот на информации Едвард Сноуден во неговото сведочење пред Парламентарното собрание на Советот на Европа.
Своето обраќање, Сноуден го спроведе преку видео-линк од Москва.
Како што образложи во минатото, Сноуден и денес во сведочењето нагласи дека Националната агенција за безбедност на САД во соработка со другите разузнавачки служби од Европа, набљудувала и до најобични луѓе и тоа преку веб-камери во спалните соби, каде што се добивало материјал кој воопшто не претставувал закана за безбедноста.
Прашан дали се набљудуваат комуникациите помеѓу организациите за човекови права, Сноуден вели не само во САД, туку и надвор од нејзините граници. НСА ги нагледувала или таргетирала доверливите комуникации помеѓу некои од највисоките луѓе во организациите.
– НСА таргетираше лидери и работници на ваквиот тип на организации, како дома така и надвор, информираше Сноуден без да посочи за кои организации за човекови права се работи.
Во своето сведоштво посочи дека тој нема намера да и наштети на американската влада.
– Сакам да појаснам дека немам намера да и наштетам на владата на САД или да ги влошам билатералните односи помеѓу било кои земји. Мојата мотивација е да ги поправам владите, а не да ги урнам, вели поранешниот вработен во НСА.
Тој пред европарламентарците посочи и дека секаков вид на интернет сообраќај може да се следи и анализира со многу малку напор.
Според техниките, личноста се идентификува според одредена социјална, политичка или религиозна припадност, за која понатаму може да се прави посебно портфолио.
Сепак, Сноуден нагласи дека, владата на САД не подготвува никакви црни сценарија преку масовниот надзор, но напомена дека и покрај тоа се работи за уривање на приватноста на луѓето.
На сесијата освен Сноуден говореа и експертот по право Дауви Корф, како и Хансјорг Гајгер, поранешниот шеф на германската разузнавачка служба.
Токму Гајгер истакна дека во борбата против масовниот надзор, потребен е кодекс според кои би се воделе службите во Европа и како и помеѓу НАТО сојузниците, за кои рече, не смеат да работат една против друга.
Гајгер претстави четири правила според кои треба службите за интелегнција да постапуваат.
Hansjörg Geiger, the former head of Germany’s Federal Intelligence Service