Речиси израмнети резултати, со многу мала разлика во полза на ГЕРБ над „Има таков народ “, иако се уште постои шанса за пресврт – вакви се првите резултати од излезните анкети на избирачите при малата активност на предвремените парламентарни избори во Бугарија, пишува „Медиапул“. Засега, БСП го задржува третото место, а на четврто е „Демократска Бугарија“, која го подобри резултатот во споредба со претходното гласање од четврти април. ДПС се петти, а коалицијата „Исправи се” е на шестото место. Засега, ова се политичките сили кои го преминуваат цензусот, а најверојатно коалицијата „Патриоти“, од која дел е и ВМРО-БНД на Красимир Каракачанов останува надвор од парламентот. Сепак, останува допрва да пристигнат гласовите од дијаспората кои во април им дадоа голема поддршка на партијата на Слави Трифонов и „Демократска Бугарија“.
Според Галуп, излезноста до 19 часот била 34,5 проценти. Според Централната изборна комисија (ЦИК) излезноста изнесувала 27,20% во 16 часот.
Според излезната анкета на „Галуп“, ГЕРБ добива 22,1% поддршка, а „Има таков народ“ – 21,5%. Трета е
БСП со 15,1 процент. „Демократска Бугарија“ има 13,7% од гласовите, а ДПС – 12%. Шестата сила во Собранието е „Исправи се” со 4,8%.
Ова беа прв избори во Бугарија кои се спроведоа со целосно машинско гласање, а само половина процент од уредите имале техничи проблем. Денот на изборите измина без сериозни прекршувања.
Новото национално собрание ќе биде составено од истите партии како и претходното, но тоа траеше само три недели и се распушти заради неможноста да се состави влада. Повторно, партијата на Слави Трифонов е онаа која одредува дали Бугарија наскоро ќе има редовна влада или пак ќе влезе во поризичната опција за земјата и ќе се организираат трети парламентарни избори во истата годината, кои доколку се одржат, би биле придружени со претседателски избори наесен.
Големото прашање е дали „Има таков народ“ ќе може да го престигне ГЕРБ – евентуално со гласови од странство. Тогаш тоа ќе биде првата партија на која ќе и биде доделен мандат за формирање кабинет и според неофицијалните информации Слави Трифонов веќе бил подготвен за состав на Влада.