Граѓаните на Македонија, а посебно во делот на централното градско подрачје на Скопје ќе можат да бидат сведоци на несекојдневен настан што се случува многу ретко на земјината топка. Од денеска се пуштени бесплатни билети за доручек! Ќе бидат во ограничен број од 2700. За останатите кои нема да добијат билет, можеби ќе имаат прилика да го проследат настанот преку видео бимови кои ќе бидат поставени на некој од спомениците во најблиското опкружување.
Бидете стрпливи извадете билет и сите ќе добиете јадење. И волкот сит и овците на број. Вака од денеска градот Скопје ја намалува сиромаштијата, а ќе ги здружи луѓето по етничка и духовна основа.
Мизерија на квадрат, перверзија на куп и омаловажување до бесвест. Организаторите на овој несекојдневен настан се задоволни што во голем број, редици, денеска чекале билети за на 11 септември да добијат бесплатен доручек.
Имбецилна формула која гласи: „Да се радуваш што гледаш колку гладни луѓе имаш во градот“.
Гледајќи ја денешната слика, ако ги собереме од сите градови ќе треба да се прогласи за ден на мизерија. Исто така ќе биде неработен ден зошто се ќе биде празно, иако духовно и материјално сме вееќе одамна испразнети.
И како по обичај следува политички момент контра перверзниот. Организаторите (читај власта) велат: Ова е човечност, мостовите зближуваат. Мостот имал симболика на соживот, а забораваат дека луѓето го изгубија животот.Забораваат дека мостовите во последно време на младите им служат да го поминат океанот и да дојдат од другата страна.
Се праваат споредби со држави и градови каде индивидуата може да си купи и доручек и ручек и вечера и мирно да спие. Кај нас тие што чекаат денеска за билет, ќе обезбедат бесплатен доручек на 11 септември и полн стомах за да не ги испијат апчињата на гладно.
Она што не може да го смисли ниту еден режисер е и фактот што помислиле дури и на туристите. Ќе нахранат и 200 туристи кои ќе се зближат со нашите граѓани на мостот. На здравје!!!