Родител кој инсистираше да остане анонимен, за НОВА ТВ посочи на сериозен проблем. Неговото дете претходната недела заминало на полагање со инфузија. Основецот полагал со нарушено здравје, бидејќи сака да го фати првиот уписен рок за средните училишта.
-Моето дете отиде да полага со игла на рака и се врати на инфузија после еден час. Баравме термин за полагања после една недела, но во училиштето ни рекоа дека Законот не предвидува такви ситуации. Ова не е хумано општество, нема правда, те оставаат пред свршен чин. Немаат решение. Моето дете се оперираше, но за да не му пропадне уписот оди со дрен на полагања. Подоцна нема да има место во гимназиите, се знае во кои училишта ќе има место, вели родителот.
Заклучно со полагањата кои се спроведуваат денеска, екстерното тестирање за годинава е завршено за основците и средношколците во Македонија. Оние ученици кои не успеаја да полагаат во првиот рок за екстерните тестирањо од 2-10 јуни, втора шанса ќе имаат на почетокот на август. Потребно е да приложат само лекарско уверение, за да го образложат отсуството во првиот рок.
Основците сметаат дека августовската сесија е доцна, бидејќи ако полагаат тогаш, нема да ги фатат првите уписи во средните училишта.
Првиот уписен рок во средните училишта е на 23 и 24. јуни. Втор рок е на 30ти месецов и 1ви јули. Тоа значи дека основците кои не успеаја да ги положат предметите од екстерното тестирање до сега, ја губат шансата за уписите во овие термини и се принудени да чекаат до 21. август.
Од Министерството за образование велат дека немаат предвидено конкретни мерки за учениците кои би отсуствувале на екстерното тестирање од здравствени причини. Затоа тие и сите останатите кои од најразлични причини изостанале, ќе полагаат во август.
-Ние како министерство се трудиме ниеден ученик да не биде оштетен, меѓутоа доколку има индивидуални случаеви кои од различни причини не успеале да полагаат во првиот термин, имаат августовска сесија. Tоа е тоа, вели портпаролот во министерството за образование, Давор Политов.
Политов посочи дека деновиве ќе се знае точната бројка колку ученици го пропуштиле првиот рок за тестирање.
Реформскиот проект за екстерното тестирање стана контроверзен уште од самиот старт, за жалбите на учениците и наставниците кои реагираат на нелогичностите во прашањата и проблемите со електронскиот систем објави и НОВА.