Бел мантил за лекарот, медицинската сестра ќе биде облечена во син мантил, болничарот во светло сив, а техничкиот персонал во црвен или бордо комбинезон. Ова стои во новиот протокол кој е обврзувачки за сите вработени во јавното здравство.
На овој начин министерот Тодоров ќе го подига нивото на болничка култура и услужливост меѓу пациентите и лекарите, како и дефинирање на тоа кој што преставува внатре во болницата.
Протоколот во наредните денови ќе биде објавен во Службен весник.
„Хоспиталната култура е сегмент од организациската култура што го регулира начинот на средување на односите во една здравствена установа во која пациентот е во центарот на вниманието, што ја има во сите развиени здравствени системи. Во нашите здравствени установи имаме врвна опрема, инвестираме во знаење и обука на персоналот, а единствено ни недостасува средување на организациската култура и начинот на однесување изјави министерот Тодоров.
Според Тодоров слабостите во организациската култура се детектирани преку проектот Таен пациент што го спроведуваше Министерството во изминатата година, а чија цел било откривање на начинот на кој се средени односите во здравствениот систем.
– Протоколот предвидува здравствените работници да го сменат начинот на комуникација со пацинетитете и кон нив да се обраќаат со персирање. Мора и секој здравствен работник да носи беџ за да знае секој пациент со кого комуницира изјави Тодоров.
Според него ова е суштинската разлика меѓу јавните здравствени установи во Македонија и во странство. Пред извесно време болниците требаше да добијат мантили за вработените и пижами за пациентите бидејќи старите повеќе личеа на партали, но нема информација дали се спроведе набавката.
Кој ќе ги набавува сега новите мантили, болниците со нивните ограничени буџети или Министертвото за здравство и дали на ваков начин ќе се подобри основната хигиена во болничките соби, ординациите и операционите сали останува да се види.