Со доделувањето на наградите златна, сребрена и бронзена „Камера 300“, синоќа во Битола заврши 35. Интернационален фестивал на филмската камера „Браќа Манаки“.
Годинешен добитник на најпрестижната фестивалска награда, златната „Камера 300“, е украинскиот кинематографер Валентин Васјанович, за неговиот дебитантски филм „Племето“.
Полскиот кинематографер Ричард Ленчевски ја освои сребрената „Камера 300“, за филмот „Ида“. На Ленчевски ова му е трета награда која ја освојува на фестивалот, откако во 2001 освои златна, а во 2005 година бронзена „Камера 300“.
Бронзената „Камера 300“ му беше доделена на Ентони Тат Редклиф, кинематографер од Велика Британија, за филмот инспириран од конфликтот во Северна Ирска со наслов „71“.
Меѓународното стручно жири ја додели и традиционалната Мала златна „Камера 300“ за најдобар краткометражен филм. Оваа година наградата ја доби Константин М. Есадѕе од Грузија, за филмот „Динола“.
На последната фестивалска вечер, Друштвото на професионалните филмски работници на Република Македонија на режисерот Милчо Манчевски му ја додели наградата „Златна ѕвезда на македонскиот филм“. Фестивалот беше затворен со премиерното прикажување на домашниот филм „Деца на сонцето“, на режисерот Антонио Митриќески.
Јубилејниот 35.ИФФК „Браќа Манаки“ ќе остане запаметен по гостувањето на тројцата оскаровци: славната француска актерка Жулиет Бинош и кинематограферите Крис Менџис и Лука Бигаци.
Фестивалот ќе го паметиме и по кавгата помеѓу директорката на „Браќа Манаки“ Лабина Митевска и режисерот Столе Попов која се случи на црвениот тепих, како и по скандалозната изјава на истиот режисер, кој на прес-конференција фестивалот го нарече „мала селска приредба“.
Токму филмот на Столе Попов „До балчак“, кој премиерно беше прикажан на годинешното издание на „Браќа Манаки“, ќе биде единствениот македонски кандидат за „Оскар“ во конкуренција на филмови од неанглиското говорно подрачје.
И уште нешто.
На фестивалот не се случи најавуваниот протест на битолските дуќанџии, кои се закануваа дека заедно со своите семејства ќе дојдат да протестираат пред Центарот за култура во Битола, заради неисплатената отштета од страна на продуцентската куќа „Триангл“. Нешто се случи, па најавениот протест не се одржа.
Но затоа пак синоќа пред црвениот фестивалски тепих се случи ненајавен мирен протест на битолската опозицијата.
Претседатели на битолските ограноци на опозициските партии, пратеници, членови на општинскиот Совет и други високи партиски функционери, со транспарент на кој пишуваше „Каков воздух дишат битолчани!?“, одржаа мирен протест пред битолскиот Центар за култура.
Според организаторите, протестот имал за цел да укаже на загадувањето на воздухот во Битола и околината и да ја поттикне свеста и совеста кај надлежните институции, власта на ВМРО-ДПМНЕ и градоначалникот Талески, сериозно да ги сфатат апелите за решавање на овој проблем за кој опозицијата се залага една година.
Видно расположена, екипата околу директорката на „Браќа Манаки“ Лабина Митевска, со аплаузи помина по црвениот тепих. На новинарско прашање дали тие некому аплаудирале, или пак ним некој им аплаудирал, покажувајќи со рака кон протестантите Митевска рече:
„Ние им аплаудиравме бидејќи, вика, „Битола сака чист воздух“, а и ние сакаме за Битола чист воздух. И за цела Македонија“.