Со пароли и извици „Паѓа влада“, „Не ја силувајте слободата“, „Слобода за Шиповиќ“ и свирежи, претставници на опозициската коалиција предводена од СДСМ, како и граѓаните кои го поддржуваат претседавачот на Советот на општина Центар Мирослав Шиповиќ, се собраа денеска пред зградата на Основен суд – Скопје 1 во знак на протест поради „полициско – политичките апсења од страна на режимот на Груевски“.
Претседателот на Социјалдемократскиот сојуз, Зоран Заев, изјави дека преку денешниот протест неговата партија нема намера да врши притисок, туку да пушти порака да се почитува законот и да се охрабрат судиите да носат одлуки во согласност со законот.
„Имаме човек кој не само што не сака да побегне, туку се враќа назад, и добро е што е уапсен во Виена, а не во Америка, што значи дека сака да се врати назад да се брани од слобода“, рече Заев.
Тој кажа дека во судот предочиле што значи блокирањето на Центар, како и тоа дека неговиот имот, и станот на заменик-претседателката на СДСМ, Радмила Шеќеринска ќе им бидат на располагање на судот како гаранција за Шиповиќ.
– Колку што се важни одлуките на овој суд, но законот ги дава олеснителните околности-тоа се одземање патна исправа, хипотека на имот, еднаш неделно да се појавува на суд, предочивме дека и нашите имоти ќе ги имаат на располагање, нашите имоти ги нудиме, мојот стан, станот на Радмила Шеќеринска, на други наши членови, потенцираше Заев.
Според него, стравот и силата демонстрирана од власта, СДСМ нема да ја дозволи.
Градоначалникот на општина Центар пак, Андреј Жерновски, изјави дека не се плаши од наводната акција „Градоначалник“.
„За мене ова не е никаква случајност. Со ова се спречува реализирање на изборните ветувања, со ова се спречува поништување на ДУП – овите и нормално функционирање на општината, бидејќи на дневен ред имаме ребаланс на буџетот, а потоа и усвојување на буџетот“, изјави Жерновски.
Жерновски надополни дека диктатурите се разликуваат по траењето, но на крај завршуваат од народот.
Пред насобраните поддржувачи на Шиповиќ, се обратија и Гордан Георгиев и Душко Илиевски, млекарот од Битола, кој го охрабри Шиповиќ да издржи во ова,
Шиповиќ утрово беше уапсен на виенскиот аеродром, враќајќи се од САД во Скопје преку Франкфурт и Виена.
Според процедурите, на Шиповиќ ќе му биде одреден најпрвин екстрадиционен притвор, кој може да тре два до три дена, а потоа се очекува тој да биде пренесен во Македонија.
Иако по Шиповиќ првично имаше распишано само интерна потерница, вечра МВР по барање на судот распишале и меѓународна потерница.