По американската премиера на „Соба со пијано“, во рамките на јубилејното педесетто издание на Интернационалниот Филмски Фестивал во Чикаго, филмот ја доживува својата светска дистрибуција на најпопуларните видео платформи. Наскоро, „Соба со пијано“ ќе биде поставен во продавниците на iTunes и Google, а потоа и на Netflix, Sony Entertainment Network, Amazon, Vudu и Hulu.
Како дел од програмата World Cinema на фестивалот во Чикаго кој е најстариот компетитивен фестивал во Северна Америка, препознатлив по постојаната потрага и претставување на најдобрите и оригинални филмски дела и автори, „Соба со пијано“ бил проследен со огромен интерес.
Проекциите на 18-ти и 19-ти октомври, биле распродадени три дена однапред. Пред почетокот на Фестивалот, на големо задоволство на Скопје филм студио, филмот се најде на листата од десет фестивалски филмови кои мора да бидат видени, препорачана од чикашкиот Major Onions.
Претставници на филмот во Чикаго се режисерот Игор Иванов и продуцентот Томи Салковски.
Најавено е учество на „Соба со пијано“ на уште неколку фестивали на американскиот континент, а следното прикажување на филмот во Европа ќе биде во ноември оваа година на Eastern Neighbours Film Festival во Хаг, Холандија.