Вкупно 119 000 евра се собрани со бирање на телефонските броеви за донации за настраданите од поплавите во Србија и Босна и Херцеговина, потврдуваат од Црвениот крст, што значи дека помошта е дуплирана за неполн ден.
Македонската Влада се уште не одлучила дали ќе се откаже од ДДВ-то собрано од донациите на граѓаните и парите ќе ги пренасочи кај настраданите од поплавите. Во Владата немаат одговор дали ќе го следат примерот на Хрватска која објави на Твитер дека се откажува од данокот и парите ќе ги пренасочи на погодените од поплавите.
„Се уште нема такви информации, ќе контактираме со Министерството за финансии, ќе ве известиме доколку има промени, изјави за НОВА Александар Георгиев, портпарол во Владата.
Од секоја донација од 100 денари преку мобилните телефони за данок се одделуваат 18 денари. На досега собраната сума тоа е речиси 19 000 евра, пари од граѓаните кои се слеваат во буџетот на државата.