Според македонското собрание, пратеникот на СДСМ, Игор Ивановски, во својот говор пред Советот на Европа, вчера изнел невистини и дисквалификации за случувањата на 24 декември минатата година.
Во реакцијата од Собранието се вели: жалиме што се повторуваат ситуации кога се прави обид да се девалвира капацитетот на сопствена татковина да се справува со предизвиците, а борбата за власт станува главен мотив при нашето претставувањето пред најстарата европска и други организации.
Во своето обраќање пред Парламентарното собрание на Советот на Европа координаторот на пратеничката група на СДСМ, Ивановски вчера истакна дека на 24 декемвски авторитарниот режим во земјава успеал да го избрише владеењето на правото и правната држава, слободата на медиумите, човековото право за изразување и уставното право на застапување на гласачите.
Тој додаде дека македонската Влада и мнозинството решиле да го усвојат буџетот на сила.
– На 24 декември 42 пратеници беа оневозможени да учествуваат во сесијата на Собранието со одземање на нивните картички за гласање. Пратениците беа физички исфрлени од пленумот на Собранието, по што физички беа отстранети и новинарите. Целиот настан беше снимен од опозициски пратеници со нивните телефони. По тој црн понеделник Собранието на РМ го изгуби легитимитетот, опозицијата беше приморана да го бојкотира Собранието и да бара предвремени парламентарни избори како единствен начин да се врати легитимитетот на Собранието – објасни Ивановски во Стразбур.