Законот за заштита на сведоци и Законот за Специјалното обвинителство денеска се пред пратениците во Собранието кои ќе одлучуваат за потребата од измени.
Обвинителката Катица Јанева неколку пати побара од пратениците да изгласаат промени на Законот за заштита на сведоци, за СЈО да може да навлезе во сржта на предметите „Нешковски“, „Монструм“ и „Сопот“. Предлогот со измени таа го достави во Собранието уште во април.
Продолжувањето на рокот за работа на СЈО и судбината на заштитените сведоци сега зависат од гласовите на независните пратеници и албанската партија ДПА, откако ДУИ кажа дека ќе ги поддржи законите.
Талат Џафери, координатор на пратеничката група на ДУИ во интервју за НОВА изјави дека тие ќе ја дадат нивната поддршка за законите.
Лидерот на ВМРО-ДПМНЕ, Никола Груевски пак отворено кажа дека тие нема да ги поддржат промените кои ги бара обвинителката Катица Јанева за продолжување на рокот за работа на СЈО и измена на законите за заштита на сведоци и приватноста.
Сепак, и без ВМРО-ДПМНЕ, законите може да бидат изгласани доколку за нив, заедно со СДСМ, гласаат сите независни пратеници, како и партијата ДПА.
Грчева, Буралиева, Поповска и Адили ќе ги поддржат измените кои ги бара Јанева
Независниот пратеник Зулфи Адили, и пратеничките Солза Грчева, Љубица Буралиева и Лилјана Поповска за НОВА потврдија дека тие ќе ги поддржат двата закони кои ќе влијаат врз работата на СЈО.
„Не е коректно тие да не функционираат без добар Закон за заштитени сведоци. Ако постои закон за СЈО, нека биде како што треба“, изјави Адили за НОВА.
Сличен е ставот и на Грчева, која вели дека таа јавно говорела дека рокот за работа на СЈО од 18 месеци е прекраток, уште кога се носел законот и се воспоставувала оваа институција.
„Без оглед на некоректното однесување на Катица Јанева кон пратениците, јас ќе ги поддржам и двата закони. Можеби не ја поддржувам Јанева, но самото СЈО како институција го подржувам, да си ја заврши работата за која е формирано“, изјави Буралиева за НОВА.
Пратеничката Лилјана Поповска од ДОМ за НОВА изјави дека и таа ќе ги поддржи законите.
„СЈО не може нормално да ги заврши процесите без овие закони, мора да има заштита врз сведоците, за да не им се случи она што му се случи на Коста Крпач“, изјави Поповска за НОВА.
Пратеничката Роза Топузовска Каревска, за НОВА изјави дека таа ќе го поддржи Законот за продолжување на рокот на работата на СЈО, но се уште не знае како ќе гласа за Законот за сведоци.
„Со оглед дека се работи за СЈО и за неговото функционирање ќе ги поддржам, особено што се однесува на рокот, иако не сум за тоа да има безгранично рокови, треба да има рокови, без рок кај нас знаат да се развлечат до бескрај. Цел народ очекува да се стави веќе крај на оваа ситуација. Во овој момент се уште не знам во однос на сведоците, треба да го погледнам предлогот и потоа да донесам одлука“, вели Топузовска Каревска.
Од ДПА засега не откриваат како тие ќе гласаат и дали ќе ги поддржат промените кои ги бара СЈО. Пратеникот Имер Алиу вели дека за законите ќе се изјаснат денеска.