Доставените предлози за сите четири граѓански иницијативи поединечно, од предлагачот Стојанче Ангелов се беспредметни.
Ова е соопштено денеска од Кабинетот на претседателот на Собранието на Република Македонија.
Во соопштението се подвлекува дека иницијативите за распишување референдум не се во согласност со закон и се појаснува дека во членот 28 став 1 од Законот за референдум и други облици на непосредно изјаснување на граѓаните таксативно се наброени прашањата за кои не може да се распише референдум на државно ниво, а тоа се прашањата што се однесуваат на: буџетот на Република Македонија и завршната сметка на буџетот, за јавните давачки, за резервите на Република Македонија, за прашања на изборите, за именувања и разрешувања.
До претседателот на Собранието на Република Македонија на 22. мај 2013 година, се доставени четири граѓански иницијативи на државно ниво за распишување на референдум, сите четири поднесени од Ангелов.
Првата е граѓанска иницијатива за распишување референдум на државно ниво на кој граѓаните непосредно ќе се изјаснат дали се „за“ или „против“ автентичното толкување на членот 1 од Законот за амнестија, дадено на седницата на Собранието на Република Македонија одржана на 19 јули 2011 година.
Поднесена е и граѓанска иницијатива на државно ниво за распишување на референдум на државно ниво на кој граѓаните непосредно ќе се изјаснат дали се „за“ или „против“ Законот за територијална организација на локалната самоуправа во Република Македонија.
Третата граѓанска иницијатива на државно ниво е за распишување референдум на кој граѓаните непосредно ќе се изјаснат дали се „за“ или „против“ припадниците на ОНА, кои учествувале во конфликтот во Република Македонија во 2001 година, да вршат јавни функции во Република Македонија.
И четвртата, граѓанска иницијатива за распишување референдум на кој граѓаните непосредно ќе се изјаснат дали се „за“ или „против“ припадниците на ОНА кои учествувале во конфликтот во Република Македонија во 2001 година, да добијат посебни права утврдени со закон.