Министерката за правда Дескоска смета дека не треба да се брза со изборот на нови членови на Комисијата за антикорупциска додека не се воведат новите критериуми и не биде изгласан новиот Закон. Сепак таа додаде дека конечната одлуката дали ќе се продолжи со селекција на кандидатите по стариот Закон не е во нејзина надлежност, туку е во надлежност на Собранието.
„Препораките коишто ги добиваме од Европската комисија е дека нас ни треба комисија којашто ќе биде избрана по највисоки критериуми, а овие препораки што ги добивме се однесуваат токму на процесот на селекција. Моја првенствена цел во рамките на Министерството за правда е да ги внесеме највисоките европски стандарди коишто ни ги сугерираат од Европската унија и Венецијанска комисија“ рече Дескоска.
Во Министерството за правда подготвиле амандмани за забелешките од европските експерти и ги испратиле до Европската комисија.
„Направивме амандмани на Законот, а целиот текст е повторно пратен на Европската комисија, очекуваме повратен одговор. Ни ветија дека ќе биде што е можно поскоро, со цел да можеме да ја изодиме постапката во рамки на Собранието, за донесувањето на законот да заврши овој месец според нашиот план. Се зависи од тоа кога ќе добиеме повратен одговор на амандманите коишто ни ги пратија“ рече Дескоска.
Европските експерти сугерираат Антикорупциската комисија да брои 5 наместо досегашните 7 члена. Сметаат дека тие треба да ја водат целата прекршочната процедура, а Судот да одлучува само по тужбите. Понатаму, имале сугестии и околу делот на селекција на кандидатите и побарале да се обезбеди сигурност дека комисијата за избор и именување во Собранието ќе гарантира дека ќе ги избере оние коишто се најдобрите.
Во Министерството за правда изработиле две алтернативи и ги испратиле до Европската комисија.
Комисијата за спречување корупција нема избрано нови членови од март годинава, кога пет члена на ДКСК поднесоа оставки.
Пред два дена, Комисијата за избори и именувања се обиде да утврди предлог-состав како до сега, со договор меѓу партиите, но седницата беше прекината.