Измените на Законот за јавно обвинителство во собраниска процедура ќе се најде на крајот на август, откако пратениците ќе се вратат од годишен одмор. Претседателот на Собранието, Талат Џафери, седницата ја закажа за 27 август.

Предлог-законот, за кој е потребно двотретинско мнозинство ќе се носи по скратена постапка, а на истата седница ќе се расправа и за предложените измени на Законот за Советот на јавните обвинители , исто така по скратена постапка.

Владата испрати предлог до Собранието во кој ги прифати дел од забелешките на опозицијата и предложи спојување на СЈО со Обвинителството за гонење на организиран криминал и корупција. Предметите на СЈО, според тој предлог, кои се во судска постапка ќе ги преземе новото обвинителство.

Се предлага ресурсите со кои располагаше Катица Јанева да ги преземе новото обвинителство. Премиерот Зоран Заев кога го презентираше предлог-законот, рече Вилма Русковска да остане на чело на обвинителството бидејќи се уште има мандат, а обвинителите од СЈО ако сакаат да конкурираат за обвинители во него, па да одлучува Судскиот совет.