Коалицијата Сојуз за иднината, денес достави Барање за итна седница на Државната Изборна Комисија на која ќе се разгледа скандалот за фантомските гласачи во Избирачкиот список за кои СДСМ објави список и видео материјал.
„Од увидот на Избирачкиот список утврдивме дека во него се запишани нови 13869 лица, кои не беа запишани во Избирачкиот список со кој се спроведуваа изборите во 2011 година, а кои не стекнале право да бидат впишани во Избирачкиот список врз основа на стекнато полнолетство од 2011 до денес”, се вели во соопштението на СДСМ.
Откако СДСМ во средата објави списоци и видео материјал за околу 345 фантом гласачи на Единствениот гласачки список , вчера излезе со нови податоци за, како што велат, лажно регистрирани гласачи кои треба да се злоупотребат на денот на изборите.
Сојузот за иднината бара Државната изборна комисија да закаже вонредна седница и во рамките на своите надлежности да ја провери веродостојноста на податоците добиени од МВР која е надлежна за издавање на државјанства, лични документи и адресни податоци, кои се предуслов за внес на лицата во Избирачкиот список.
Исто така, тие бараат да се провери основот за упис на 13 869 ново запишани лица во Избирачкиот список, а кои не се стекнале со вакво право врз основа на стекнато полнолетство од 2011 до денес.