Кому му пречи црвеното знаме? Зошто од масата протестанти беше издвоен членот на Левичарското движење „Солидарност“ Васко Цацаноски и насилно нападнат и приведен од десетици полицајци? Заради црвеното знаме кое што Васко гордо го вееше во знак на поддршка на ограбените, обесправените и прегладнетите, понижените и тепаните, реагираат денеска Левичарското движење „Солидарност“ и Движењето за социјална правда „Ленка“.
Оттаму со најостра осуда за вчерашниот обид на припадниците на МВР за оневозможување на учесниците на протестите пред Владата при остварувањето на со Уставот загарантираното право на протест.
Во видеото погледнете како активистот Васко Цацаноски беше лишен од слобода.
„Ја осудуваме употребата на прекумерна сила при која беа полесно повредени неколку граѓани. Бараме внатрешната контрола на МВР конечно да профункционира и да ги санкционира ваквите насилни испади од страна на вработените во МВР, односно Единицата за брзо распоредување. Го осудуваме и застрашувањето на граѓаните од страна на МВР преку поднесувањето на „соодветни пријави“ против организаторот на протестите и Васко Цацаноски“, велат од „Солидарност“ и „Ленка“.
– Остро го осудуваме и тенденциозниот и невистинит опис на настаните изнесени во соопштението на МВР по повод протестот на стечајците. Нашиот член кој е издвоен за приведување само го вееше црвеното знаме на солидарноста. И утре, кога синдикатот при МВР ќе ја побара нашата помош, ќе излеземе и ќе го вееме истото знаме за поддршка на нивните работнички и социјални права.
– Повикуваме на почитување на темелните вредности на уставниот поредок на Република Македонија – обезбедување на основните слободи и права на граѓанинот, како и зачувување и унапредување на хуманизмот, социјалната правда и солидарноста, соопштуваат овие две движења.