Уште од првите звуци на македонското дело на авторите и брачна двојка- маестрата Дијана Илкоска-Имери и пијанистот Дино Имери, знаевме дека сме дел од музичка историја и уникатен, емотивен концерт – спој на шпанскиот и македонскиот фолклор
Скопје, синоќа, во фоајето на НОБ, пред уважени гости, амбасадори и претседателката Гордана Силјановска-Давкова (со дузина телохранители) ја слушна светската премиера на концертот во три става „Дон Кихот во Скопје“, за пијано, гитара, наратор и камерен оркестар, напишан годинава од двајцата врвни автори и брачна двојка- маестрата Дијана Илкоска-Имери и пијанистот Дино Имери. Вечерта беше специјална – се славеше националниот ден на Шпанија. Гостите, движејќи се низ фоајето, со чаша пијалок, пред концертот, можеа да уживаат во амбиентот инспириран од култната приказна за славниот витез Дон Кихот на Мигел де Сервантес.
Беа изложени уметнички слики од познатата колекција „Дон Кихот“ на реномираниот македонски уметник Владимир Георгиевски (1942-2017), во чии дела е користена фундаменталната мисла на метафората на главниот јунак Дон Кихот: „Да се спаси човештвото од сите зла и болештини за среќа на сите луѓе на светот“. Исто така, беа изложени и нови скулптури на младата уметница Јана Николовска, а беше промовирана и илустрирана книга за деца „Дон Кихот“ на македонски јазик. Гостите на течен македонски јазик ги поздрави и шпанскиот амбасадор во земјата, неговата екселенција Рафаел Сориjано Ортиз.
Уште од првите звуци на македонското дело, под диригентство на Дијана Илкоска-Имери со камерниот оркестар „ИД“, и солистите: Дино Имери на пијано, Ади Имери на гитара и Тина Иванова, нараторка и авторка на текстот, почувствувавме дека сме дел од музичка историја и уникатен, емотивен концерт – спој на шпанскиот и македонскиот фолклор. Оригиналната музика што ја создале авторите, е дел од еден поголем мозаик преку кој се раскажува современата приказна за Дон Кихот, кој, пак, го носат во Скопје и преку текстот на Иванова, кој ни дава едно поинакво гледање на вечниот роман сместувајќи го во денешно Скопје, се бори (и ги победува) трите ветерници – лицемерството, неправедноста и рамнодушноста.
Првата иновација е самата идеја да се направи ваква фузија – не знаеме за друго вакво дело што ги спојува овие два елемента. А потоа, иновативен е начинот на кој се тие комбинирани, како и деликатниот баланс во кој тие коегзистираат. Од една страна се чувствува транзицијата од шпанскиот кон македонскиот фолклор како што се одвива и дејството на приказната, односно како Дон Кихот патува од Ла Манча и пристигнува во Скопје. Во овој дел се користи шпанскиот ритам хота во триосмински такт, кој се претвора во карактеристичниот македонски седумосмински такт.
Може да се забележи дека шпанскиот и македонскиот фолклор се во постојана интеракција низ целото дело сѐ до крајот. Третиот став кулминира во мошне интересна комбинација помеѓу ритамот на нашето пајдушко и шпанската малагења. Почувствувавме дека авторите го истражиле шпанскиот фолклор и неговите карактеристики темелно. Всушност, пристапиле со огромна почит и љубопитност, а го истражувале и фолклорот од повеќе региони во Шпанија. Публиката го препозна тоа и вистински се изненади и уживаше синоќа слушајќи го делото. Дополнителен печат ѝ даде гитарата – маркантен инструмент во шпанската традиција, која оживеа во рацете на Ади Имери, кој гостуваше како солист на овој концерт.
На крајот од концертот публиката силно аплаудираше. Им честиташе на изведувачите, насмевките се измешаа со солзите во очите на маестра Дијана Илковска-Имери, која и лично изминативе месеци се бореше со трите ветерници – неправедноста, лицемерството и рамнодушноста, во периодот пред и откако неправедно и незаконски ја изгуби својата работа во Филхармонија.
Но, секој од нас носи во себе носи еден Дон Кихот. А има ли подобар начин да се победат ветерниците, освен преку нивната спротивност – праведноста, искреноста и љубовта? „Дон Кихот во Скопје“ е голем дел од лична и професионална преродба на еден од авторите, чин на верба и надеж во подобра иднина, но и порака дека во Македонија има вредни луѓе што заслужуваат свое место под сонцето и покрај сите сопки и пакост упатени кон нив.
Текстот е сопственост на Независен.мк